PIPILA pa lang gani kaadlaw sa dihang niluwat og pamahayag si Presidente Rodrigo Duterte nga lisod gyud diay puohon ang pagkatap sa gidiling drugas dinhi sa nasod, sunodsunod usab dayon ang patay sa mga inilang drug personalities sa mga gipahigayong buy bust operation ilabi na dinhi sa Sugbo.
Niadtong Martes sa gabii, si PO3 Ryan Quiamco, usa sa gihinganlan ni President Rodrigo Duterte nga nalambigit sa tigpayuhot sa gidiling drugas, ang napatay sa bust operation uban sa iyang asawa nga si Rizalyn kinsa gikataho nga mabdos atol sa maong hitabo.
Giingon nga nakigpinusilay si Quiamco sa mga operatives diha sa Pooc, Talisay City human kini makadiskitar nga usa ka undercover sa mga tinugyanan sa balaod ang iyang gika-negotiate nga mopalit og binultong shabu.
Migintang lang usab og pila lang ka oras, sa silingang syudad sa Naga, duha usab ka mga drug personalities ang natipi sa laing bust operation sa kapulisan.
Ang naila nga napatay didto sa Brgy Lanas mao sila si Michael Pacana ug Oscar Encabo nga pulos residente sa Naga.
Niadtong Lunes, laing giingong drug pusher sa lungsod sa Tuburan nga si Ulysis Baja ang napatay usab sa mga kapulisan human kini nakigpinusilay ug laing Roberto Cruzpero ang natigbak usab sa Barangay Kamputhaw, dakbayan sa Sugbo.
Kini nagpamatuod lang nga bisan pa man sa pangangkon sa presidente nga lisod gyud ang pagpakgang sa pagkatap sa gidiling drugas sa nasod nagpabiling hugot gihapon ang iyang kampanya batok niini.
Gani ang mga dagkong isda na karon ang iyang gitarget. Mao ni mensahe nga gustong ipaabot sa presidente -- padayon mo, kay magpadayon sab siya sa iyang katuyo-an.