NM Tolentino nilanding sa ika-duha sa chess tourney

MILANDING sa ika-duha nga pwesto si National Master (NM) Rustum Tolentino atol sa 1st Kadayawan Fide rated rapid open chess tournament niadtong Dominggo, Agusto 13, sa Lanang Business Park, Davao City.

Kini, human giparot ni Tolentino si NM Macacuna Aki Macala sa Davao City sa ika-walo ug kataposang round.

Nisalo si Tolentino nila NM Henry Lopez sa Panabo ug NM David Elorta nga parehas nihuman og 6.5 puntos matag usa.

Apan, solong naangkon ni Tolentino ang ikaduha nga pwesto tungod sa taas nga tie-break points batok sa duha diin nahulog lang sila Lopez ug Elorta sa ika-tulo ug ika-upat nga pwesto, sunod-sunod.

Samtang, gihawod ni Grandmaster Joey Antonio ang torneyo agi paghuman og pito ka puntos diin tunga sa punto ang deperensya sa nagsunod kaniya.

Nasilyo ni Antonio ang kadaogan agi sa draw kang Lopez sa kataposang round.

Hapit sab nisalo ang usa pa ka Kagay-anong NM nga si Levi Mercado sa grupo sa 6.5 pointers.

Wala lang nasustinar ni Mercado ang iyang four-point advantage batok kang Fide Master Randy Segarra sa kataposang round.

Parehas sila Mercado ug Segarra nisalo sa ika-lima paingon sa ika-13 nga dapit nga adunay unom ka puntos matag usa.