Top sa bar, board exam sa Lapu apil sa pasidunggan

MGA ningpasar sa Bar ug licensure examinations nga taga dakbayan sa Lapu-Lapu ang lakip nga pasidunggan atol sa tinuig nga "Taxpayers’ Night" karong gabii.

Sa labing unang higayon, ang mga bar ug licensure passers ang tunolan og cash incentives base sa bag-ong ordinansa nga gi-aprobahan sa konseho sa Lapu-Lapu niadtong Hulyo 25, 2017.

Si Mayor Paz Radaza nagkanayon nga angayan lang nga pasidunggan ang maong mga nakapasar nga nagha­tag og garbo sa dakbayan ila­bi na nga nagsugonson ang mga Oponganon nga nasulod sa Top 10 sa mga nasudnong pasulit.

Nag-una sa talaan si Brylle Gilbuena nga taga-barangay Gun-ob nga milandig sa unang dapit human sa Mechanical Engineering Licensure Examination niadtong Marso 2017, gisundan sa manag-agaw nga Vianca Pearl Amores ug Marianito Jesus del Rio sa barangay Bankal nga top one sa May 2017 Certified Public Accoun­tant Licensure Examinations.

Samtang, Top 2 si Nona Casey Baring nga taga-barangay Punta Engaño human sa June 2017 Nursing Examination.

Sila si Gilbuena, Amores ug del Rio ang makadawat og P100,000 samtang si Baring dunay P90,000 cash incentives.

Sa kadtong mga pasado apan wa masulod sa Top 10 ang ma­kadawat sab og tag-P5,000 sa higayon nga makaduso sa dokomento nga nagpamatuod nga mipa-ubos sa maong mga pasulit ug voter’s ID.

Ang Office of the Mayor mo-verify sab sa opisyal nga talaan sa mga nipasar diha sa Supreme Court ug Professional Regulatory Commission sa dili pa mo-release sa cash incentives.

“Fitting recognition by granting appropriate cash incentives to these residents of Lapu-Lapu City, is proper not only to reward them for their achievements and for giving pride and honor to the City, but also to motivate other residents to excel in their field and endeavours,” tipik sa natala sa resluyson nga nipasar sa konsehyo sa Lapu-Lapu.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph