ANG kabag-ohan mahimong mahitabo bisan asa bisan sa balay, trabahoan, ug ilabi na sa pribado ug gobyerno nga sektor; busa, posibleng interbensyon nga programa ang himuon aron matubag ang maong kabag-ohan.
Tungod niini, ang Professional Schools sa University of Mindanao nagdasig sa ilang mga estudyante nga maglusad og pagpaniksik sa mga suliran sa ilang trabahoan aron makahimo og solusyon di lamang sa ilang organisasyon apan ngadto sa ilang mga kliyente - ang publiko.
Usa sa mga rekisitos sa ilang thesis ug dissertation writing human sa title ug outline defense mao ang paglusad og public research forum aron mahibalo ang masa labot sa ilang gihimong pagpaniksik.
Niadtong Agosto 12, 2017, ang mga estudyante sa Doctor in Public Administration (DPA), Doctor in Business Administration (DBA), ug Master in Public Administration (MPA) nagtinabangay sa paglusad sa forum nga gititulohan The Materiality of Academic Research: A Public Research Forum and Community Extension Project nga dunay tema: "Addressing Change through Research."
Ang katuyoan sa forum mao ang pagdiskobre sa uwahing pagpaniksik alang sa public administration, lakip na program planning ug evaluation sa nagkadaiyang organisasayon ug mag-abay sa bag-ong uso sa pagpaniksik.
Atol sa preparasyon, si Dr. Eugenio S. Guhao, Jr., dean sa Professional Schools, nagpahimangno sa mga estudyante nga mag-imbita og panel of reactors ug partisipante gikan sa gobyerno ug pribadong sektor aron maseguro nga ang ilang pagtuon mapahibalo sa gitinguha nga benepisyaryo.
Dinapit nga reactors mao sila Dr. Marylou L. Sarazate, chief sa Conservation and Development Division sa Department of Environment and Natural Resources (DENR)-Davao Region, Dr. Anastacia G. Notarte, Provincial Agriculturist sa Davao del Norte, ug Mr. Anatalio O. Suter, Jr., program director sa Manila Broadcasting Company's Aksyon Radyo Davao.
Mga imbitado nga partisipante gikan sab sa maong mga opisina, akademya, kapulisan sa Davao City Police Office, ug representante sa mga pribadong institusyon sa siyudad.
Unang namulong si Miss Lihb Anthony L. Limama sa Office of Panabo City Mayor James Gamao. Iyang thesis gititulohan "Service Quality of Pag-ibig Fund Office Employees: Basis for Quality Feedback."
Si Limama, kinsa kanhi empleyado sa Pag-ibig Fund, interesado sa pagtabang sa maong opisina sa pagpalambo sa ilang mga serbisyo aron motaas ang katagbawan sa mga kustomer.
Si Samuel Anay, Senior Agriculturist ug Livestock Sector Coordinator sa Panabo City Agriculturist Office, mipresenta sa iyang dissertation nga gititulohan "Implementation of Livestock Dispersal Program and Satisfaction of Beneficiaries: Basis for Intervention."
Si Anay, kinsa professor sa Professional Schools sa University of Mindanao, interesado sa pagdesinyo sa intervention program aron matubag ang pipila ka suliran sa dispersal projects sa mga local government units sa rehiyon.
Si Prof. Glenne B. Lagura, sa Davao del Norte State College ug University of Southeastern Philippines, mipresenta usab sa resulta sa iyang dissertation nga gititulohan "What is Life for Street Sweepers in the Cities of Davao Region? A Phenomenological Study."
Si Lagura, usa ka international public research forum speaker sa South Korea, way kakapoy nga nagtrabaho sa kalisdanan nga giatubang sa mga street sweepers sa rehiyon nga angay tubagon sa gobyerno gamit iyang dissertation.
Siya gisundan ni Police Supt. Francis Donald Brillante, deputy director for administration sa Davao City Police Office, kinsa mipresenta usab sa iyang thesis nga gititulohan "Work Values and Organizational Commitment of PNP Personnel in Davao City."
Ang tumong sa iyang thesis mao ang pagsusi sa work values ug organizational commitment sa kapulisan sakop sa dose ka presinto sa siyudad.
Misunod niya si Forester Alberto N. Bandiola kinsa mipakita sa resulta sa iyang dissertation nga "Implementation of EO 23 and Public Image of DENR Enforcers: Basis for Intervention."
Si Bandiola mao karon ang Community Environment and Natural Resources Officer (Cenro) sa Monkayo, Compostela Valley Province. Siya usab professor sa UM Professional Schools.
Ang presentasyon ni Bandiola gisundan ni Prof. Lywylyn S. Mendoza kinsa nagtuon sa Quality of Work Life of Food Chain Employees in Region XI: A Causal Model.
Si Mendoza usa ka full-time professor sa College of Business Administration of Holy Cross College of Davao ug part-time professor sa Ateneo de Davao University.
Siya buot mohatag solusyon sa kalisdanan nga giatubang sa mga empleyado sa tanang food chains sa Davao Region.
Sa katapusan, kining tigsuwat, gikan sa Sun.Star Davao Superbalita ug professor sa UM Professional Schools, mipresenta sa resulta sa iyang dissertation nga gititulohan "A Structural Equation Model on Public Image of Broadcasters in Region XI, Philippines."
Iyang dissertation nagsusi sa lebel sa imahe sa mga magsisibya sa radyo gamit ang cultural intelligence, journalistic function, ug ethical principles isip independent variables.
Ang kopya sa iyang dissertation ipaambit sa Kapisanan ng mga Brodkaster ng Pilipinas (KBP), mga sibyahan, ug uban pang ahensya.
Si Dr. Zarasate ug Dr. Notarte mipadayag sa ilang pasalamat sa mga researchers ug faculty members sa Professional Schools kinsa nag-organisa sa maong forum.
Si Richard Algabre, sa Davao City Sangguniang Panlungsod ug college professor sa University of Mindanao, kinsa usa sa mga partisipante nga mihatag sa iyang pamahayag labot sa forum, naglaum nga ang resulta sa ilang pagtuon magamit sa pagtubag sa kabag-ohan sa gobyerno ug pribadong sektor.
Si Dr. Victoria O. Ligan, MPA/DPA program coordinator, nagseguro nga ang publiko makabenepisyo gikan sa ilang pagtuon isip parte sa program educational objectives ug student learning outcomes sa kursong Master ug Doctor in Public Administration.
Ang forum nagmalampuson tungod sa suporta ug tabang ni Dean Eugenio S. Guhao, Jr., D.M.; MPA/DPA Program Coordinator Dr. Victoria O. Ligan, Community Extension Project Coordinator Dr. Gerlieta Ruiz, Research Coordinator Dr. Ana Raissa T. Trinidad, Miss Lovely Aizyl Diwata, Miss Anabelle Gubat, ug tanang empleyado sa Professional Schools.