GIANGKON ni Police Chief Inspector Henry Cay-as, hepe sa Community relation sa Cagayan de Oro Police Office nga iyang gikonsidera nga magpapili pagka konsehal sa Dakbayan sa Cagayan de Oro ubos unta bando sa Padayon Pilipino.

Apan gibutyag ug giklaro niini nga nibalibad siya taliwala sa kaikag nga magpapili hilabi na nga anaa sa iyang huna-huna ang pagserbisyo sa katawhan labina niadtong batan-on pa siya nagsilbi siya isip SK Chairman sa Barangay Puerto.

Gipasabot ni Cay-as ang rason nganong dili usa kini ipadayon kini tungod kay adunay usa ka oportunidad nga miabot kaniya ug kini mao ang pagserbisyo sa nasod sa Haiti isip sakop sa United Nation Peacekeeping Force sulod sa usa ka tuig.

Gibutyag niini nga niadto pang tuig 2010 niapplay ug nag-exam niini ug ning tuig lamang 2015 siya gitawagan nga gikatakdang molupad gawas sa nasod karong umaabot bulan sa Hulyo.

Matod ni Cay-as nga iyang gikonsidera ang pagpapili unta pagka konsehal sa siyudad tungod kay mag early retire unta siya karong bulan sa December ning tuig apan tungod sa dakong opurtunidad mibalibad siya sa partido.

Matod ni Cay-as nga tapuson niya ang iyang pagpamulis tungod kay aduna pa siyay 15 ka tuig sa pagserbisyo.

Hinuon mapasalamaton si Cay-as sa mga kapitanes nga mi-indorso kaniya nga mahimo untang parte sa partido.(SVB)