HAPIT maputol ang liog sa 45-anyos nga amahan human gisanggot niadtong Martes adlaw sa Sitio Subokan, Barangay Cuña, lungsod sa Sagay, probinsya sa Camiguin.
Si Police Senior Inspector Dennis Flores hepe sa Sagay Police Station niila sa biktima nga si Marcos Cabigne, residente sa susamang dapit.
Gitumbok nga suspetsado ang stepson nga gi-ilang si Jobel Cabasog, residente sa susamang dapit.
Gibutyag ni Flores nga usa sa ilang nakitang motibo sa pagpatay mao ang panagbikil human giingong nahalinan og kopra ang biktima apan daw wala gibahinan si Cabasog nga giingong apil sa nitabang sa pag-atiman niini.
Sa sinugdanan gi-ingong nagsumbagay lamang ang duha apan wala gayud makuntento ang suspetsado ug mikuha og sanggot ug deretsong gitigbas makapila ka higayon ang biktima.
Hapit usab maputol ang liog niini samtang nahiwa usab ang kamot sa biktima.
Gani misukol pa ang biktima pinaagi sa pagamit og kutsilyo hinungdan nadunggaban usab kini apan gipildi kini sa sanggot nga gamit sa suspetsado hinungdan nakabsan gayud sa iyang kinabuhi.
Ang kapolisan nga miresponde pangulohan ni Flores ang daling mipangita sa suspetsado kinsa didto nila naabtan sa usa ka balay tambalanan sa probinsya human nakaangkon og samad dinunggaban.
Gi-angkon sa suspetsado ang iyang nahimo ug miingon nga nahimo lamang niya kini tungod sa iyang kaulit ug pila na ka higayon nga daw galaog kini kaniya.
Sa pagsulat ning balita gikatakdang mag-atubang og kasong murder ang suspetsado.