GIPAAK sa unggoy ang biktima samtang naglingkod-lingkod kauban ang asawa niadtong Lunes sa hapon sa Balongis, Balulang, Dakbayan sa Cagayan de Oro.

Samad sa tuo nga bukton ang naangkon ni Tomasito Baldecanas, ug mulupyo sa nahisgutang dapit.

Sa impormasiyon gikan sa Northern Mindanao Medical Center diin gidala ang biktima nasayran nga samtang nagpahangin kini uban sa iyang pinalanggang’ asawa nakita pa niini nga nagdagan-dagan na ang unggoy sa taas diin kini nakahigot.

Wala damha nga nakabuhi ang maong hayop gikan sa iyang higot ug kalit nga giambakan ang maong biktima.

Gisagang pa niini apan gipaak hinuon kini sa unggoy hinungdan nga nakaangkon kini og samad pinaakan sa iyang bukton.

Sa pagsulat niini nga balita padayon pa nga nagpaalim ang biktima sa iyang samad nga naangkon sa nahisgutang balay tambalanan.