GIPAHUNONG ang motorsiklo nga gisakyan sa duha ka mga biktima ug gikulata pa kini human giatangan sa upat ka wala maila nga suspetsado niadtong Lunes mga alas 11:00 sa gabii sa Salay, Misamis Oriental.

Angol ang mga biktima nga sila si Marlou Savaña, ug Dison Dispo, pulos lumolupyo sa nahisgutang’ dapit.

Sa nakuha nga impormasiyon sa Sun.Star Superbalita gikan sa Northern Mindanao Medical Center (NMMC) ning Dakbayan sa Cagayan de Oro diin gidala ang mga biktima nga samtang paingon sila sa Sugbongcogon kay mamista sa maong dapit sakay sa XRM nga motorsiklo nga gimaneho ni Savaña kalit kini silang giatangan sa maong mga wala maila nga suspetsado.

Gipahunong ang mga biktima dayon og sipa sa ilang motorsiklo hinungdan nga natumba kining maong mga biktima ug gikulata pa.

Gi-ingong nakadagan palayo si Dispo apan si Savaña kinsa maoy nagmaneho ang nakulatahan gayud sa maong mga suspetsado tungod kay wala man kini nakapalayo.

Nakaangkon si Savaña og samad sa ulo, baba, pangos sa tuhod ug bun-og sa mata agi og pagkulata samtang samad usab sa ulo ang naangkon ni Dispo.

Nagpabilin pa nga nagpaalim ang mga biktima sulod sa NMMC ning dakbayan samtang gawasnon pa ang maong mga suspetsado.