NABANIOG ang pangalan ni Chief Supt. Raul Petrasanta nga maoy pinakapaborito ni PNoy nga sunod nga itudlo nga permanenteng hepe sa kapolisan sa nasod.

Ang Officer-In-Charge sa ka­polisan nga Si Heneral Leo­nardo Espina moreti­ro na karong bowana nga wa­la hatagi ug higayon ni PNoy nga matudlo nga PNP Chief. Si Espina ang nagsilbing Acting PNP Chief human gisuspenso sa Ombodsman ug unom ka bowan ang nakontro­bersyal nga si Heneral Alan Purisima.

Human natapos ang pagkasuspenso ni Purisima, nahuhungihong nga ibalik siya ni PNoy ug tudlo nga permanenteng hepe sa PNP. Tungod sa paghapuhap ug pagpangga ni PNoy ang gituohang hinungdan nga pabilin lang nga O.I.C. si Espina.

Pero posible nga dunay nakatambag ni PNoy nga sobra na kaluod ug hugaw na kaayong tan-awon sa katawhan kon ibalik si Purisima nga hepe sa PNP. Nasuspenso siya sa Ombudsman tungod sa giingong palusot sa kontra sa mga armas. Dunot na kaayo si Purisima tungod sa iyang pagpanghilabot sa ope­rayon sa Special Action Force (SAF) nga miresulta sa kamatayon sa 44 ka mga commandos.

Ang kang Petrasanta nga pangalan ang nadungog nga maoy sunod nga itudlo nga hepe sa PNP. Giindorso siya sa kaalyado ni PNoy nga si House Speaker Feliciano Belmonte Jr. Sama ni Purisima, si Petrasanta ang naglangkob sa mga trusted aides ni kanhi Presidente Corazon Aquino.

Laing dakong pabor ni Petrasanta kay suod siya ni Purisima. Makabalibad kaha si PNoy sa hunghong ni Purisima aron ibotang si Petrasanta sa labing taas nga posisyon sa PNP? Sila si Purisima ug Petrasanta daw mga langam nga managsama og balhibo.

Dungan silang nasuspenso sa Ombodsman tungod sa anomaliya sa mga armas. Si Petrsanta nga kanhi hepe sa Firearms and Explosives Office (FEO) gisuspenso sa Ombodsman tungod sa pagpamaligya ug mga armas sa gobyerno ngadto sa mga rebeldeng komonista.

Kon si Petrasanta ang ibotang nga hepe sa PNP, mahimong magsabotahe lang sila ni Purisima sa paghimo ug palusot. Daw dili na sila katlan nga mohimo og binoang kon tinuod man ang mga akusasyon.

Hinuon, sa mata sa balaod inosente pa si Petrasanta hangtod nga dunay hingpit nga hukom ang hukmanan nga siya sad-an. Apan sa daghang mata sa katawhan ug sa kapolisan, konbiktado na si Petrasanta.

Ang han-ay sa kapolisan nanginahanglan ug lider nga taas ug pundasyou sa moralidad. Gikinahanglan ni aron mahimong ligdong ang atong mga polis pinaagi sa paghimong idolo sa ilang lider nga ligdong.

Karon nga kuwestyunable na daan ang moralidad ug kaligdong ni Petrsanta, unsaon man niya pagtarong sa han-ay sa kapolisan? Dili kaha pangilogan ang mga pulis kon modiskurso si Petrasanta ug kaligdong apan siya miagig kasuspenso tungod sa korapsyon?