DAKONG sagpa ngadto sa mga kontra sa pulitika ni Bise Presidente Jejomar Binay ang resulta sa labing ulahing survey sa Pulse Asia nga nipagawas nga ang bise presidente maoy labing “gidayeg” ug “gisali­ngan” tali sa mga opisyal sa kagamhanan.

Mas nakapakurat sa survey nga gihimo sulod sa Mayo 30 ngadto sa Hunyo 5, diin niabot sa labing taas nga ang-ang ang pag-ataki sa iyang imahen sa pag-utingkay sa Senate blue ribbon subcommittee ug hukom sa Court of Appeals (CA) sa pag-freeze sa bank accounts sa pamilyang Binay, lakip sa hulga sa pagsikop sa ikaduhang labing taas nga lider sa nasod sa paningkamot nga mapalusot ang kasong plunder.

Apan sud sa maong panahon, ang Pulse Asia nagkanayon nga mas nitaas hinuon og 12 porsiyento ang approval rating ni Binay ngadto sa 58 porsiyento ug nitaas og 15 porsiyento ang iyang trust rating. Mas importante ang approval ug trust ratings kon itande sa presidentiables human naapsan na siya sa unang higayon og pipila ka punto ni Senador Grace Poe.

Unsay buot ipasot niini? Tataw nga sagpa sa iyang mga kontra human wala makadulot ang dag­hang akusasyon ug kontrobersyal nga korapsiyon gipalutaw batok kaniya.

Seguro, pamulitika lang kini nunot sa nagkaduol nga eleksyon sa Mayo 2016. Dili ba kaha kuwestiyonable usab ang mga opisyal nga nag-ugkat sa baho sa bise presidente busa dili sila katuhoan?

Tungod sa pagtaas sa pagsalig ni Binay, nag­pabilin siyanga lig-ong presidentiable.