Dear Papa Joe,
Ako si Arlene, 17. Ang akong problema kabahin sa akong amo nga grabe ka estrikta. Di ko kasabot sa iyang batasan kay mangasaba siya bisan wala koy sala kaniya.
Ako man unta gibuhat ang akong responsibilidad sa balay pero para kaniya kuwang gihapon ang akong gipanghimo. Dili siya maka appreciate sa akong trabaho.
Naglibog na kaayo ko niya kay kon makaadto ni siya sa uyab niya nga amo ra sab silingan, maayo ang iyang buot. Di na siya saputon unya iya pa kong dad-an og pizza ug klase klaseng mga pagkaon. Maayo siya og tinagdan nako.
Kapoy kaayo tungod sa iyang batasan di ko ka concentrate sa akong pag-eskwela kay abi nimo working student ko, moeskwela ko matag gabii unya motrabaho ko matag adlaw. Magubot mi diri sa balay kay iya ming pasanginlan nga nanglibak mi niya kay lagi suod man nako ang iyang mga boarders.
Wala man mi manglibak niya. Di man gani namo i-mention iyang ngalan. Suya man siya namo kay suod man kaayo mi sa iyang mga boarder, magsige ra mi og pangatwa kabahin sa among pangandoy sa kinabuhi. Pero siya permi lang sa iyang tindahan siya rang usa, walay kaestorya. Mingaw kaayo iyang life kay wala siyay suod bisag iya pa ang balay.
Ako naka-decide nga mopahawa na lang kay di ko kaagwanta sa iyang batasan. Pugngan ko sa iyang mga boarder kay lagi suod naman mi tanan. Modayon ba ko sa pagpahawa anang balaya? O magsige lang ko diri ug ako ang mo-adjust iyang batasan?
ARLENE
Arlene,
Ang ako lang ikasulti nimo nga kon di nimo kaya, then let go. Pahawa pero una sa tanan, hatagan ta ka og gamay nga mga konsiderasyon. Una kon mohawa ka, makakaplag ba ka og amo nga motugot nimo nga makaeskwela og gabii?
Now ikaw mismo niingon nga loner imong amo, bisan kinsa naman nga nag-inusara unya makadungog og grupo nga nangatawa, ma-insecure gyud. Mao sad makasab-an ka kay paagi lang na niya nga pahibaw on ka nga katabang ka, di ka magsige og kuyog o estorya sa iyang mga boarder kay maora na sab ka og boarder. Siya man gani nga nagdawat og abang sa mga boarder nagbantay man gani og tindahan. Instead mo mingle ka sa mga boarder, ubanan ba hinuon nimo siya sa tindahan, di ba?
Wa man nimo isulti ang iyang edad. Pero niingon ka nga nindot iyang batasan, magkita sa iyang uyab. Siguro di niya gub-on ang adlaw kon mahimo kay diha lang siya nalipay. So, sabta. Pero if di mada og sabot, then pangitag laing amo. Salamat.
PAPA JOE
(sa inyong tampo ipadala sa papajoesuperb@gmail.com)