PAKYAS ang Pilipinas sa paghagdaw og dugang medalya sa ikaduhang adlaw sa Southeast Asian Games didto sa Kuala Lumpur Convention Center sa Malaysia.
Kini human nga igo lang milandig sa ikaupat nga puwesto sa Wushu event si Daniel Parantac, 26-anyos, kinsa kaduha makahagdaw og gold sa Singapore SEA Games niadtong 2015.
Sa unang hugna, si Parantac mitali og 9.56 points apan naapsan kini sa Indonesian nga si Bobie Valentinus nga may 9.65 points. Ang pambato sa Malaysia nga si Jack Chang Loh maoy mihagpat sa gold sa score nga 9.67. Si Valentinos ang milabni sa silver ug ang taga Singapore nga si Jun Kai Chan ang mibitbit sa bronze sa score nga 9.62.
Si Parantac gipanglantawan nga maoy laing lig-ong kontender sa Pilipinas tungod sa iyang pag-angkon og mga golde sa SEA Games 2013. Naka silver usab kini siya niadtong 2011 ug silver medalist usab siya sa 2014 Asian Games.
Tungod niini, ang Pilipinas pabiling may usa ka gold, usa ka silver ug duha ka bronze ug mi-us-os kini sa medal standing ngadto sa ikapitong puwesto sa siyam ka mga nasod nga misalmot.
Ang host Malaysia padayong midominar nga may siyam ka gold, walo ka silver ug walo usab ka bronze nga gisundan sa Singapore (6-3-6), Thailand (3-4-1), Indonesia (2-4-5), Vietnam (2-3-1), dayon ikaunom ang Myanmar (2-1-0).
Ang LaO PDR (0-1-1), Brunei (0-0-3), Cambodia (0-0-3) ug Timor-Leste (0-0-0) ang pasunod nga nangiwit nga wala pay gold medal.
Samtang sa laing bahin, human makalangkat og gold medal sa women’s marathon event, lugwayan una sa Sugbuanong marathoner Mary Joy Tabal ang ilang pag-istar sa Kuala Lumpur.
Kini aron pag-abiba ug paghatag og dugang moral sa Pinoy athletes sa nagpadayon nga kompetisyon. Gikatakda unta nga mobalik sa Sugbo karong adlawa si Tabal, apan gihangyo kini ni Philip Juico, presidente sa Philippine Amateur Track and Field Association (Patafa) nga magpabilin una aron pagsuporta sa iyang mga kaubanan.
Ang Patafa maoy moabaga sa gastohan ni Tabal didto sa Malaysia.
“It’s good that she agreed to stay here. At least she can get to cheer her teammates and spend some quality time with them,” matod ni Juico kinsa nagtinguha nga maapsan ang lima ka gold medal nga nakuha sa Patafa sa Singapore SEA Games. (JBM, PR)