GIHULAGWAY ni International Boxing Federation (IBF) flyweight champion Amnat Ruenroeng sa Thailand ang iyang title defense batok kang Filipino Johnreil Casimero sa “Fight of the Century” tali nila ni Manny Pacquiao ug Floyd Mayweather.

Mao kini ang gipabuhagay ni Ruenroeng sa pre-fight presscon sa miaging adlaw sa Golden Tulip Hotel sa Bangkok.

Gipasabot ni Ruenroeng nga mas dako ug mas taas siya kumpara kang Casimero sama nga mas dako ug mas taas si Mayweather kumpara kang Pacquiao.

Nidugang si Ruenroeng nga ang iyang estilo sama sa estilo ni Mayweather nga maayong modepensa ug lihok.

Mismong si Casimero nasayod nga sukol-dagan ang estilo ni Ruenroeng apan asoy niya nga dili kini niya lung-an pag-ataki kay gusto niya kining i-knockout.

Sa interbyu sa boxingmirror.com, ang trainer ni Casimero nga si Jun Agrabio miangkon nga maayo og footwork ug jabs si Ruenroeng.

Apan gipasabot ni Ag­rabio nga nasayod na si Casimero kon unsa’y angay buhaton niini aron pag-alkontra sa estilo ni Ruenroeng gumikan kay mao kini ang ilang gitutokan sa ensayo.

Si Casimero, kinsa kan­hi world champion, nag-training sa United States gikan pa niadtong Pebrero ug masaligon kaayo ang iyang kampo nga makalangkat pagbalik og korona ang ilang batos.