SA niaging semana, mora og gibayaw ngadto sa himaya ang kanhi two-time world champion nga si Luisito Espinosa human ang Court of Appeals mibaliktad sa desis­yon sa Regional Trial Court didto sa Kaulohan kalabot sa wa niya makobra nga premyo niadtong 1997 World Boxing Council (WBC) World championship fight batok ni Carlos Rios didto sa Koronadal, South Cotabato.

Gi-dismiss man gud sa Regional Trial Court sa Manila ang gipasakang kaso ni Espinosa batok nila ni anhing boxing promoter nga si promoter Rod Nazario, matchmaker Lito Mondejar, ug kanhi South Cotabato Governor Hilario de Pedro III.

Apan ila kining gipasaka ngadto sa Court of Appeals. Human sa hataas nga katuigan sa pagpaabot nipagawas na gyud ang CA sa niaging semana sa ilang kaugalingong hukom nga nag-reversed sa unang desisyon sa Trial Court ug ning higayona pabor kang Espinosa.

Ang CA mimando nga bayaran ni Nazario og US$130,349 (P5.7 million) plus interest si Espinosa. Gi-dismiss ang kaso batok ni Mondejar kay dili man kini signatory sa kontrata samtang absuelto usab si De Pedro tungod sa teknikalidad.

Sa laktod nga pagkasulti, si anhing Nazario kinsa mipanaw na sa laing kalibutan niadtong 2009 maoy nahan-okan sa tanan tungod kay nabulilyaso man, pero og nagmalampuson pa ang maong promosyon unya nikita og dako labing siguro apil sila sa bahin kay sila may gasabot-sabot. Kay namatay na man si Nazario, ang korte mimando nga ang mga nahabiling kabtangan niini maoy ibayad ngadto sa 47 anyos nga retiradong boksidor.

Niini, maapektohan ang mga anak o sumosunod sa kabtangan ug katigayonan ni Nazario.

Pero pastilan. Mora man og haw-ang ug temporaryo pa diay ning naangkon nga hustisya ni Espinosa.

Kini tungod kay mahimong moapelar pa man diay ang kampo ni Nazario ngadto sa Supreme Court. So, modagan pa ni og laing hataas pa nga mga katuigan una pa niya mahibaw-i kon unsa gyud ang final decision sa kasong iyang gipasaka.

Mao ni kapait basta mga inila o dagkong tawo maoy ma-involve sa kaso. Lisod pangitaon ang hustisya – ilabi na dinhi sa atoa.

******

Sakit-sakit gyud ning nahitabo sa University of Cebu (UC) Webmasters da. Tiaw mo bay usa sa ilang sinaligan nga si Darrell Shane Menina nakuha gyud sa Mapua Cardinals didto sa Kaulohan.

Sa Cebu City Mayor’s Cup tournament diin misalmot ang UC ug ang Mapua, nasigpatan sa Cardinals si Menina ug blind ang mga coaching staff sa UC nga gisubmarina na diay ang ilang pambato.

Kompiyansa kaayo ang Webmasters ug paghuman sa torneyo mao na lay ilang nahibaw-an nga nilayat na sa pikas parel si Menina uban ni Marc Obado ug adto na kini magbasehan sa Manila.

Busa alang sa mga Cesafi teams, sa sunod higayon kon duna gani tournament nga mosalmot ang taga Manila, kinahanglan hinugtanay gyud sa bakus sa inyong pagbantay sa mga players.

(junmigs0622@yahoo.com)