Genoguin: Kinsa kining Davao Group?

NAKURATAN kitang taga Davao sa dihang gibulgar sa usa Mark Taguba, usa ka custom broker, nga adunay Davao Group nga nagdawatan og payola gikan sa Bureau of Customs (BOC), dili binulan kun dili per container van.

Kinsa kining Aka Tita, Nanie, Rackie, ug Small? Ang ato lang naklaro sa Small mao si Nilo “Small” Abellera, usa ka Konsehal nga nagrepresenta sa atong unang distrito, miingon kitang atong naklaro tungod kay giapil ang iyang pangalan ni Senador Antonio Trillanes nga sumonan sa Senate blue ribbon committee aron maimbestigahan.

Ugmang adlawa, Martes, atol sa regular session, segurado kita nga motindog kini siya sa hawanan sa konseho atol sa collective personal privilege aron tubagon ang akusasyon batok kaniya, aron sa ingon mahinloan ang iyang pangalan nga giampingan sa iyang amahan ug apohan.

Karon lang usab kita nakabati nga dunay mga public official sa Davao City nga nahilambigit sa anomaliya sa BOC nga nahimong Presidente ang atong kanhi Mayor Rodrigo Duterte. Ang nakaparat kay gilambigit pa gyud sa dakong shipment sa druga nga nagkantidad og P6.4 billion.

Nahibawo usab kita ang sentro sa mga black propaganda sa mga kaaway sa politika kadtong mga public officials nga taga Davao aron ilang ma pin down ang kataas sa rating sa atong presidente may kalambigitan sa kampanya batok sa ginadili nga druga nga daghan nang gipangtumba.

Lisud pangitaon ang ebidensiya kon maoy atong pagabasehan kon tinuod ba nga nagdawat kining mga tawhana og payola gikan sa BOC, kon wala ka’y black and white nga makita, tungod kay mga bright usab kining mga tawhaha, wala kini kalainan sa pipila ka police nga nagdawat og payola gikan sa mga financers sa illegal gambling nga Last 2.

Pinaagi niini, igo ang tanang mga police nga pulos nagdawat og mga payola gikan sa illegal gambling bisan kon pipila lang kanila.

Ingon usab niini ang atong konseho karon, naduhigan og dili maayong dungog, kinahanglan hinloan ni Konsehal Nilo “Small” Abellera ang iyang pangalan aron dili maduhig ang usa ka institution nga anaa siya karon.

Hilabihan ka taas ang atong respeto sa atong mga konsehal kay ato silang pinili. Hinaut nga dili tinuod ang mga pasangil kanila, ug labaw sa tanan dili usab tinuod nga may umaabot unta silang million of pesos kon gipirmahan pa sa atong, Mayor Sara, ang Mega Harbour.

Dili kita gusto nga mamalik pa ang dakong anomaliya sa han-ay sa atong mga konsehal kanhi, ang S.I.R. Huang deal, sa dekada 80, ug kanang City Council building karon nga dilapidated, nga nagpakasapi ang mga konsehal niana niadtong dekada 90.

Hinumdomi ninyo kanunay nga ang kampanya karon sa atong presidente, mao ang droga ug kurapsiyon, hinaut nga kamong mga lokal public official sa Davao mao ang sumbanan sa kahinlo ug katarong aron dili ma-ulawan ang atong presidente nga dinhi gikan sa atong dakbayan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph