GIKONSIDERAR na karon ni boxing legend Oscar De La Hoya ang pagbalik og away.
Ang gitawag og Golden Boy, kinsa miretiro niadtong 2008, nagkanayon nga 50-50 na ang poruhan kon mobalik ba siya’g away o dili.
Nag-edad siya og 42.
Gipasabot ni De La Hoya nga nindot na ang iyang pamati human sa iyang rehabilitasyon gikan sa paggumon sa paggamit og ginadiling drugas ug ilimnong makahubog.
“I feel great -- 42 is the new 32,” matod ni De La Hoya sa interbyu sa ESPN. “I feel amazing. In my life right now, I have so much motivation. I am so hungry and so determined.”
Si De La Hoya miretiro human siya gipaundang ni kanhi 8-time world champion Manny Pacquiao sa 8th round niadtong 2008.
Naggunit og 39-6, 30 knockouts nga rekord, si De La Hoya gipahiluna sa Boxing Hall of Fame sa miaging tuig.
Giklaro ni De La Hoya nga dili pinansyal maoy hinungdan sa iyang pagbalik. Matod niya nga gimingaw lang gyud siyang moaway.