DAKO ang pasalamat ni Davao City Mayor Sara Duterte-Carpio sa tanang stakeholders sa Kadayawan Festival 2017 gumikan sa malampusong pagsaulog niini.
Atol sa paghuman sa programa kagahapon didto sa San Pedro Square, nagpasalamat ang mayor sa tanang Dabawenyo sa kinasingkasing nga pagsuporta sa tanang mga programa sa dakbayan.
Nagpasalamat sab ang mayor ngadto sa private sector sa dakbayan nga gipangunahan ni Captain Ronald Go sa Davao City Chamber of Commerce and Industries, Inc.
Ingon man ang pagpasalamat sa mayor ngadto sa mga bisita sa dakbayan nga nakigduyog gyud sa Kadayawan luyo sa natigayong giyera sa Mindanao.
Sumala sa mayor unta natagbaw ang mga bisita sa mga programa nga gihan-ay sa executive committee sa Kadayawan gikan pa niadtong Agosto 14 hangtud kagahapong adlawa.
"Thank you for your whole-hearted support we are eternally grateful for your support to Davao City," sulti sa mayor.
Nagpasalig ang mayor nga sa Kadayawan Festival 2018 mas mapabongga pa ang mga kalingawan alang sa katagbawan sa mga bisita ug mga Dabawenyo. (Jeepy P. Compio)