DILI lang kadaugan ni Joy Tabal ug sa Pilipinas kining iyang pag-angkon og unang bulawan alang sa nasud sa gipahigayong SEA Games didto sa Malaysia.
Kadaugan sab kini sa iyang paagi sa pag-training batok niining karaang sistema sa Patafa nga nahimong palpak tungod sa politika.
Kataw-anan kay sa kadaugan ni Joy, ang mga nag-unang nibabag niya nga moapil sa maong torneyo dali kaayong naka-congratulate ug nagpa-picture dayon.
Sigi na lang nining ilang pamulitika.
Moduyog ko sa mga panawagan karon nga usbon na ang mga pamaagi sa Patafa. Ug dapat apil niini mao ang pagluwat sa katungdanan sa mga tawo nga isog nibabag kang Joy.
Kian
Di makiangayon ang kahimtang tali ni Kian delos Santos ug ang mga abusadong pulis nga nipatay kaniya.
Si Kian mao kini ang grade 11 nga tinun-an didto sa kaulohan nga giakusahan nga drug courier, gikulata ug gipusil.
Hatagan unta siya og pusil nga iyang ipakablit dayun padaganon. Apan nidagan man siya dayon busa gipusil na diretso.
Daghan ang moingon nga drug courier gyud tingale kining bataa kay nganong naglaroy-laroy pa man bisan lawom na ang gabii.
Apan ang oras diha sa CCTV diin nakita nga si Kian giguyod sa mga nag-sibilyan lang nga mga pulis nag-ingon nga pasado alas 8 pa man sa gabii. Ug ang dapit duol sa ilang tindahan.
Samtang uyon ko niining giingon nga gubat batok sa drugas, angayan lang unta nga hunahunaon sa kadagkuan sa kapulisan nga mas epektibo ilang kampanya kon maniguro sila nga di moabuso ang mga operatiba nga nisalmot sa maong gubat.
Makarason
Subo palandagungon nga samtang ang mga abusadong pulis makarason pa atubangan sa korte, ang mga inosenteng sama ni Kian dili na intawon makadepensa sa ilang kaugalingon.
Maayo na lang kining sa kaso ni Kian kay dunay mga saksi nga naningog ug wa maunhi ang pamilya sa pagkuha og kopya sa CCTV footage. Kini mao ang motingog alang ni Kian.
Ug kon mahukman nga sad-an man kining mga abusadong pulis, maayo unta kon sila ang unang masilotan og kamatayon.
Ningbalitok?
Mahimuot ko sa mga komentaryo nga halos wala nay Yellow karong panahona kay ningbali na daw halos tanan.
Aw, klarohon lang sab nato nga di man tanan kanhi mga Yellow ang ningbali sukad nidaog si Presidente Rodrigo Duterte sa miaging tuig.
Kadaghan baya dinhi sa Syudad sa Sugbo pananglit nga kanhi mga tigsuporta ni Binay apan nag-una-una sa paghurar isip sakop sa PDP-Laban.
(@anol_cebu sa Twitter)