ORMOC CITY - Samdan ang usa ka lalake human gipusil sa Purok 1 sa Barangay Tambulilid ning dakbayan gahapon sa alas 11 pasado sa buntag.

Ang biktima giila nga si Jose Cobero alyas Hapon, anaa sa hustong edad ug mulopyo sa barangay.

Samtang ang suspek giila sa alyas nga Akmad, anaa sa hustong edad, nagpuyo sa samang barangay.

Dali nga gidala sa Ormoc Doctors Hospital ang biktima human kini makaangkon og samad pinusilan sa iyang nawong ug likod nga bahin sa lawas.

Wa pa usab masayri sa kapulisan kon unsay motibo sa pagpamusil ug ingon man ang kalibre nga gigamit sa pagpusil.

Dali nga misibat sa wa matinong direksyon ang suspek human sa insidente.

Sa paghimo ning balita, nagpadayon ang gihimong hot pursuit operation sa kapulisan batok sa suspek.

Niadtong Sabado sa hapon, gipusil patay ang usa ka gi­nganlan og Hadji Samad alyas Pogi didto sa Barangay Punta.

Duna nay suspek ang kapulisan apan wa pay naestablisar nga motibo.

Upat na ka insidente sa pagpamusil ang nahitabo ning dak­bayan ning buwana apan wa pay nasikop nga responsable.