ORMOC CITY - Usa ka 23 anyos nga babaye gipriso human nagpabuto og armas sa Purok Jasmin, Barangay Cogon ning dakbayan niadtong milabayng adlaw.

Giila ang suspek nga si Cherry Ann Codera, 23, dunay kapuyo, nagpuyo sa lugar kinsa tulo ka buwang mabdos.

Base sa spot report, naglalis ang suspek ug ang iyang kapuyo nga si Luiz Kim Sacay ug sa kasuko nikuha kini sa kalibre .22 nga armas ug gipabuto sa yuta.

Wa pa matino og unsay gilalisan sa duha.

Naalarma ang mga silingan ug nitawag sa kapulisan. Nakuha sa posisyon sa suspek ang armas.

Nagdumili sa paghatag og pamahayag ang suspek.

Kasong indiscriminate firing ug illegal possesion of firearms ang giatubang ni Codera.