Kaabag milusad og adbokasiya sa Ormoc

ORMOC CITY- Gilusad sa grupong Kaabag ang ilang adbokasiya alang sa dakbayan sa Ormoc.

Ang nahisgutang mga adbokasiya mao ang Con­sumer Protection, Peace and Order ug Traffic Problem.

Makita usab sa pipila ka parte sa Ormoc ang mga tarpaulin nga gibutang sa Kaabag nga dunay mga mensahe agig suporta sa ilang adbokasiya sama sa tarpaulin sa merkado nga nag ingon ang ‘Hustong Timbangan Kalipay Sa Tanan’.

Sa may Barangay Can-adieng duna usab duha ka tarpaulin diin ang usa may nakasuwat nga ‘Hapsay Nga Trapik Ekonomiya Mo Lagsik’ ug ang usa ka tarpaulin may nakabutang nga ‘Damgo sa Ormocanon Kalinaw, Kauswagan ug Kaangayan’.

Dugang pa sa Kaabag nga priority usab nila karon ang saktong disiminasyon sa impormasyon ngadto sa katawhan sama kon unsa gyod ang trabaho sa kumonidad, awtoridad, executive ug legislative department sa kagamhanan.

Giklaro sa Kaabag nga ang ilang gibuhat di tungod kay hapit ng eleksyon kon di pagpukaw ug pag-awhag sa katawhan sa Ormoc nga mopartisipar sa pagsulbad sa dagkong problema nga giatubang sa dakbayan.

Sumala ni Kaabag President Dr. Jun Yraztorza nga usa ka Non Government Organization (NGO) ang Kaabag ug di partidong politikal.

Samtang si Atty. Roy Fiel niingon nga di kinahanglan nga mosud sa politika aron masulbad ang usa ka problema kay duna pa may laing paagi sa paghimo og sulosyon.

Giangkon naman sa Kaabag nga mosuporta silag kandidato sa eleksyon nga ilang makita nga pareho nila og panlantaw para sa dak­bayan sa Ormoc.

Kon may i-endorsar o suportaan silang kandidato sa, piniliay sa 2016, wa pay tubag ang Kaabag.

Giklaro usab sa Kaa­bag nga medyo namingaw ang ilang grupo sa milabayng mga tuig gumikan sa pagbuwagbuwag sa ubang miyembro, pagkamatay sa ilang kanhi presidente ug mga medical issues.

Apan karon nga na pundok pagbalik ang Ka­abag malaumon sila nga padayon na ang paghatag og serbisyo sa katawhan.

Nailhan ang Ka­abag ni­adtong 2010 election diin pipila sa ilang gisuportahang kandidato pagka konsehal nidaog.

Ang nahitabong pa­nagtigom sinugdanan pa lang sa sunod sunod na nga tigom diin apil na ang katawhan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph