NATAGAK sa ika 45 nga pwesto ang lalawigan sa Sugbo sa Most Competitive Cities, Municipalities and Provinces karong tuiga sa National Competitiveness Council (NCC).
Sa miaging tuig, ang lalawigan nahimutang sa ika 31 nga dapit apan niadtong 2015, ang Sugbo naa sa ikatulong pwesto.
Si Roy Soledad, pangu sa Cebu Investments and Promotions Office (CIPO) sa Kapitolyo, niklaro ang pagkatagak sa probinsya sa Sugbo nagagumikan sa pagbag-o sa criteria.
Karong tuiga, ang criteria naglakip sa economic dynamism, government efficiency, infrastructure ug resilience.
Samtang sa 2016, way labot ang resilience sa criteria alang sa paghukom.
Karong tuiga, matod ni Soledad, wala na usab maapil sa lalawigan sa Sugbo ang highly urbanized nga mga siyudad sa Sugbo ug Lapu-Lapu nga makapainat unta og puntos sa ranggo niini.
Siya nidugang nga duna usab mga lungsod sa Sugbo nga wa makahatag og data sa Department of Interior and Local Government ug Department of Trade and Industry nga naglangkob sa NCC hinungdan nga nius-os ang ranggo niini.
Si Soledad niingon nga mas daghan usab ang mga lungsod sa Sugbo kon itandi sa ubang mga probinsya diin mas daghan og component cities ug highly urbanized nga mga dakbayan.
Si Soledad namahayag nga ang ranking sa Sugbo sa uwahing MCCMP wa magpasabot nga wa maglihok ang provincial government tungod kay ang sagad sa mga lungsod sa lalawigan minos lang ang populasyon ug income.
“We will be doing our best para ma-improve na,” pahayag niini.
Apan bisan sa kinatibuk-an nga ranking sa Sugbo karong tuiga, dunay pipila ka mga lungsod ang nasulod sa top 20 sa lainlaing criteria. (SCG)