CALAPE, Bohol - Nagtingkagol sa prisuhan ang usa ka lalake nga giingong lango sa ilimnong makahubog dihang giingong nanghadlok kini og usa ka estudyante ug nanumbag og usa ka pulis niadtong miaging Huwebes sa hapon didto sa usa ka tindahan sa Calape Public Market, Barangay Sta. Cruz, lungsod sa Calape.
Giila ang suspek nga si Elizar Cua, 38, minyo ug residente sa Catmonan, Calape, Bohol.
Samtang ang estudyanteng gihadlok sa hubog giila usab nga si Ryan Celis, 20, ulitawo ug usa ka intern student teacher sa Pondol Elementary school.
Sa pakisusi sa kapulisan, human madawat sa mga pulis ang taho nga adunay insidente nga nahitabo sa nahisgutang tindahan, dali dayong miresponde nga gipangulohan ni SPO1 Oscar Asoy inubanan nila ni PO3 Richen Dahunacion, PO3 Joel Dumalaoron ug PO2 Alexander Mijares.
Sa pag-abot sa nahisgutang lugar, gipangutana ang suspek sa kalmado ug maayong pagpakighinabi tungod sa kondisyon niini nga hubog.
Apan nainit hinuon si Cua sa presensya sa kapulisan ug kalit lang niya nga gisukmag ang nawong ni Dahunacion.
Napugos ang kapulisan sa pagdakop sa suspek ug gidala gilayon kini ngadto sa Calape Police Station aron matarong sa pagpangutana. (LTB)