PULIS gipusasan sa iyang batch mate nga pulis usab kay nasakpang nagsuyop og shabu sulod sa usa ka drug den niadtong Lunes sa gabii sa Arellano Street sa Barangay San Roque, dakbayan sa Sugbo.
Si PO2 Rolito Estrobo, hingkod, kanhi sakop sa Waterfront Police Station 3 sa Cebu City Police Office (CCPO) apan gibalhin sa Siquijor Provincial Police Office.
Giingong dunay “illegal activity” si Estrobo dihang sakop pa sa CCPO hinungdang gibalhin sa Siquijor niadtong 2011.
Si Estrobo nadakpan sa joint operation sa mga sakop sa City Intelligence Branch (CIB) Cebu City Public Safety Company (CCPSC) ug Waterfront police station.
Siya naaktuhan nga nagsuyop ug nakuhaag mga gamit sa pagsuyop og drugas nga naglakip sa tinfoil ug lighter sulod sa usa ka drug den.
Laing duha ka mga tawo nga giila nga sila si Shawnie Marie Dumo,18, kinsa nakuhaan og tulo ka pakiteng shabu ug si Carlo Magno, kinsa nagduwag video carrera machine lakip sa gidakop.
Si Supt. Romeo Santander, hepe sa CIB-CCPO nga nahinabi sa Sun.Star Superbalita nagkanayon nga nakadawat silag report nga dunay nagpadayong illegal gambling operation.
Ang hiniusang mga operative nigsuhid sa interior portion sa maong dapit ug nakakita silag usa ka tawo nga nagsuyop og shabu.
Apan nakugang si SPO1 Jaime Misa, team leader sa CCPSC, kay nakaila siya kang Estrobo kay iyang classmate sa 2002 recruit sa PNP.
Si Misa nakapanglingo-lingo dihang nagpusas sa iyang classmate kay wa siya makatuo nga naungo na sa pagsuyop sa ginadiling drugas.
Nitimbaya pa kaniya si Estrobo nga “Mate”.
Si Estrobo nanghimakak sa pasangil ug nipasangil sa mga pulis sa CCPO nga nasuko kaniya.
Si Santander niingon nga si Estrobo kanhi sakop sa Waterfront Police Station apan gipabalhin sa SPPO niadtong 2011.
Ilang susihon kon wa ba malambigit sa illegal drugs operation ang mao nga pulis.
Sutaon sab nila kon wa ba dismissed sa serbisyo sa SPPO diin didto kini madestino.
r