CONSTRUCTION worker nga sabog sa ginadiling drugas ni-hostage sa iyang ig-agaw ug duha ka mga silingang babaye kagahapon sa alas 5:35 sa kaadlawon sa Barangay Mabolo, dakbayan sa Sugbo.

Si Renante Amorado, hingkod, construction worker, taga Negros Oriental gipusasan sa mga sakop Mabolo Police Station ug Special Weapons and Tactics (Swat).

Si Sr. Insp. Hartzel Peter Bellido, hepe sa Mabolo Police Station nga nahinabi sa Sun.Star Superba­lita, nagkanayon nga si Amorado ni-hostage sa iyang ig-agaw nga si Marieta Cadalin, 31, ingon man duha ka mga kaubang babaye sulod sa balay.

Matod ni Bellido nga sabog sa ginadiling drugas si Amorado nga nagsigeg hangyo sa iyang ig-agaw nga si Cadalin nga mamauli sila sa Negros.

Ang biktima niaam-am nga sa buntag na lang sila molakaw kay ngitngit pa niadtong higayuna, apan nasuko, gibunalan siyag dos-por-dos ang ulo.

Nakadagan ug nakasulod sa balay si Cadalin hinungdan nga na-trap sila uban sa laing duha ka kaubang mga babaye kay nag-atang ang suspek sa gate.

Nahadlok sila kay isog kaayo, sigag mga mata nga nagdalag kabilya hinungdan nga nangayog abag sa kapulisan ang ilang mga silingan.

Sa pag-abot sa Mabolo police ug Swat, ilang gidakop ang suspek nga malinawon nga nitahan.

“Nasobrahan ni siyag gamit sa drugas hallucination na man ni siya swerte lang kay wa gyud magrabihe ang biktima dihang naigo sa ulo pagbunal,” dugang ni Bellido.