MIHANGYO ang kahugpungan sa mga bus ug mini bus operators sa mga awtoridad nga badlungon ang mga molupyo nga magsablig og tubig labi na hugaw sa tawo ug tubig gikan sa kanal ngadto sa manglabay nga mga sakyanan sa karsada karong adlawa atol sa kapistahan ni San Juan Bautista.

Si Julie Flores, presidente sa Cebu South Mini Bus Operators Association, nabalaka nga masubli na usab ang nahitabo sa niaging tuig diin mga windshield sa duha ka mga mini bus niini ang nabuak human gilabay sa mga tawo og gahi nga butang uban sa tubig.

“Okey lang og tubig, usahay butangan nila og hugaw, butangan nila og ice, usahay sa kanal sila manguha og tubig unya isablig sa mga tawo nga sakay sa among mga sakyanan. Luoy intawon kaayo ang among mga pasahero,” sugilon ni Flores sa Sun.Star Superbalita kagahapon.

Siya mihangyo ni P/SSupt. Noel Gillamac nga pabutangan og mga pulis ang mga karsada sa habagatang Sugbo labi na sa Minglanilla, siyudad sa Naga, San Fer­nando.

Nahimo na nga tradisyon sa ubang mga tawo nga panahon sa pista sa naasoy nga santos, mosablig og tubig ngadto sa mga tawo ug mga sak­yanan nga molabay sa ilang lugar.

Si Flores nidugang nga ang ubang mga drayber sa mga bus ug mini bus mahadlok mobiyahe sa maong adlaw aron di mabiktima sa mga badlungong tawo magpasagad og labay og tubig ug hugaw gikan sa kanal nga moresulta sa pagkabuak sa ilang bintana ug windshield.