KUNG usa ka sa mga turista nga midayo lang sa Davao City aron mosaksi ug makigduyog sa gikonsiderang 'Festival of all Festivals' di ka gyud kalimot sa kasinatiang daw talagsa ra mahitabo sa kinabuhi.
Gikan sa kasadya sa mga street party, bonggang street dances ug drumbeats competitions ingon man ang usa sa mga highlights -- ang Pamulak sa Kadawayan (Floral Float Parade) ngadto na sa kaonan sa kadalanan, hitsas ang tanan alang sa maong festival.
Siyempre di gyud mawala ang pag-selfie ug pag-groupie uban ang barkada ug kapamilya sa mga giparada nga mga floats nga gama sa preskong mga bulak ug prutas nga maoy sagad nga abunda sa siyudad.
Sa unom ka dagkong mga competing floats mikampiyon ang International Pharmaceuticals Incorporated (IPI) diin gipakita sa float sa IPI ang mga nagkadaiyang presko nga bulak, diin makita ang dakong Agila nga naglupad ug dunay mga dagkong Unggoy sa likod nga pulos gama sa preskong bulak.
Sa small category ang float sa Palawan Pawnshop ang mikampeyon nga dunay mga lumad nga nagsayaw-sayaw nga gipalibutan og dagkong mga Durian nga maoy usa sa mga nailhan nga prutas sa dakbayan.
Gawas sa Pamulak, mibida sab ang onse ka mga tribu sa Davao City sa ilang Kadayawan Village ug ang Bantawan sa Magsaysay Park, samtang gipakita sab sa mga lumad ang ilang kinaadmang duwa didto sa People's Park.
Sa Indak-Indak sa Kadalanan, mikampyon sab ang Sagayen National High School Performing Arts of Asuncion, Davao del Norte alang sa open category samtang sa Davao-based category nag-kampyon ang Davao City National High School Special Program In The Arts-Sining Sayon Dawet Cultural Ensemble.
Sa kalampusan sa Kadayawan, dako ang pasalamat ni Davao City Mayor Sara Z. Duterte-Carpio sa tanang stakeholders sa Kadayawan Festival 2017 gumikan sa malampusong pagsaulog niini.
Nagpasalamat ang mayor sa tanang Dabawenyo sa kinasingkasing nga pagsuporta sa tanang mga programa sa siyudad.
"Thank you for your whole-hearted support we are eternally grateful for your support to Davao City," sulti sa mayor.
Nagpasalig ang mayor nga sa Kadayawan Festival 2018 mas mapabongga pa ang mga kalingawan alang sa katagbawan sa mga bisita ug mga Dabawenyo. (Uban sa istorya nila Ella Leen Kate Legarda, Randie Jardin Comilang, Christian Dez Ray Apique, ug Christian Gerard Briones/UIC Interns)