DIGOS CITY - Mopaguwa og ayudang pinansiyal ang local government unit (LGU) ning dakbayan pinaagi sa duha ka mga resolusyong giduso sa City Disaster Risk Reduction and Management Council (CDRRMC) alang sa mga dakbayan sa Marawi ug Surigao.
Mismong si Digos City Mayor Joseph Peñas nagbutyag nga anaa na sa Sangguniang Panlungsod (SP) ang pagtugot sa CDRRMC nga mohatag og P500,000 nga ayudang pinansiyal.
Si City Treasurer Jake Uy ang moalokar og P300 mil alang sa Marawi City, samtang si budget officer Al Gealon ang mogahin sab og P200 mil alang sa mga biktima sa linog didto sa Surigao City.
Ang resolusyon giaprobahan atol sa 3rd City Peace and Order Council (CPOC) meeting sa miaging semana.
Gitataw ni Peñas nga kuhaon ang pundo gikan sa badyet sa CDRRMC.
"We have been helping our neighboring cities when man-made and natural disasters occurred in the past. We have to help Marawi since they suffered a lot in the ongoing war. Besides, Mayor Gandamra is a friend. We also need to send financial assistance to the earthquake victims in Surigao. It's better to help than becoming a victim," asoy ni Peñas.
Gitataw sa mayor nga siya mismo ang motunol sa ayudang pinansiyal ngadto sa Marawi sa takdang panahon.
"We have to wait for the proper time. That is, when the war is over," niya pa.
Giawhag sab sa lokal nga gobyerno ang mga molupyo sa siyudad nga modonar og mga pagkaon ug uban pang panginahanglan sa mga biktima nga anaa pa sa evacuation center.
Matud ni Peñas nga ang City Social Welfare Office maoy naghupot sa mga internally-displaced persons nga ania nagpahipi sa dakbayan.
Nasuta nga mokabat sa 102 ka mga pamilya ang nipasilong sa siyudad sukad miulbo ang kasamok sa Marawi niadtong Mayo 23.