ADUNA'Y bag-ong kan-anan sa lungsod sa Argao nga mo-level sa mga sikat nga kan-anan sa dakbayan sa Sugbo.
Ang 624 Carlock St. sa Barangay Lamacan dili lang malamian nga pagkaon ang gitanyag apan lakip na ang relaxing nga lugar.
Kon tan-awon sa gawas ang restaurant, balay kini apan kon imoha kining sudlon, usa diay kini ka restaurant.
Panimalay kaniadto sa mga Osorno ang restaurant ug tungod kay anaa na sa dakbayan sa Sugbo ang kasagaran nila hinungdan nga caretaker nalang ang nagdala niini.
Apan niadtong nakalabay nga tuig, nakadesider si Dave Bryan, 28, ang tag-iya sa 624 Carlock St., inubanan sa iyang amahan, nga himuon ang balay ngadto sa usa ka kan-anan.
Pebrero 2017 pormal nilang gibuksan sa publiko ug karon, gidagsa na usab dili lang sa taga Argao apan lakip na ang mga turista.
Filipino cuisine ang sagad sa menu ug adunay pipila sa pagkaon nga aduna'y personal touch ni Bryan, sama sa Sisig ni Bryan.
Angay usab ninyo nga tilawan ang Argao Amigo Ribs ug ilahang barbecue sama sa chicken ug liempo.
Tungod kay sagad sa pamilyang Osorno anaay background sa hotelier hinungdan nga dili na lisod nila ang pagtukod sa kan-anan.
Mamahimong maka-akomodar ang restaurant og 70 ngadto sa 85 ka tawo sa usa ka kan-anan.
Abli sila gikan sa alas 11:00 sa buntag hangtod alas 2:00 sa hapon alang sa paniudto ug 4:00 sa hapon ngadto sa 11:00 sa gabii alang sa panihapon.
Kasamtangan karon nga gitukod ang mini bar luyo sa restaurant alang sa mahiligon sa ilimnong makahubog apan aduna gihapon sila'y mga ilimnon nga baligya sa ilang restaurant.