Ayaw pagtanom og ebidensya: Bato

SI Police Director General Ronald dela Rosa nipahi­mang­no sa mga sakop sa Police Regional Office (PRO)-Central Visayas sa di pagpadaghan sa gidagha­non sa ilang mga nadakpan pinaagi sa pagtanom og ebedinsya sa mga durugista.

“Huwag ninyong gawin yan. That is very bad. God is watching us,” sa iyang pagpamulong sa iyang pagduaw kagahapon sa PNP Central Visayas alang sa anibersaryo niini.

“Huwag ninyong kalimotan merong maniningil at maniningil sa atin sa bandang dulo. Mas maganda na yung kinasingkasing nga pagtrabaho ug pagserbisyo,” dugang niya.

Gipaneguro ni de la Rosa nga wa nay mangamatay sa mga drug suspect, basta di lang mosukol sa mga pulis.

“Di ko kahatag og assurance no kay dili man ko Ginuo. Dili ko Ginuo nga kabalo ko nga wa­la nay mamatay kon duna miy drug operation. Dili man ko ana ka powerful,” siya niingon.

Iyang gipahinumodman ang iyang mga sakop sa pagrespeto sa mga katungod sa gidudahang mga kriminal.

“Kon kamo mga pulis gahi gyod mog mga ulo, buhaton na ninyo ang mga illegal nga buhaton...segurado magkakaso gyod mo, magkaproblema gyod mo,” nagkanayon si de la Rosa.

“We will not stop our operations, but let’s do it properly. Tarungon nato mga walay kinabuhi nga masayang.”

Si de la Rosa niingon nga nakaapekto sa imahe sa kapulisan ang kamatayon sa 17 anyos nga si Kian Delos Santos sa Caloocan City.

Matod ni dela Rosa bisan ang mga pulitiko nagpadako sa maong isyu.

Giparelibuhan na hinuon ni­ya sa katungdanan ang tulo ka mga pulis sa siyudad sa Caloocan nga nakapatay kang Delos Santos atol sa ilang gihimong one time big time operation.

Ang rason sa pagparelibo sa katungdanan sa maong mga pulis aron kahatagan og dalan ang gihimong imbestigasyon sa Camp Crame.

“Tungod sa isyu nga gisakyan pag maayo, so demoralized ang police nga involved sa operation but ipadayon gihapon namo ang kampanya bisan demoralized na mi,” dugang ni dela Rosa.

Pasidungog

Si de la Rosa niduaw sa pulis sa Cordova nga napusilan sa ilang subject sa anti drug operation sa miaging buwan sa Barangay Mambaling sa syudad sa Sugbo.

Si PO1 Dennis nagpabilin pa sa Sacred Heart hospital human nga nakaangkon og samad pinusilan sa iyang lawas.

Gani duna pay nag-ungot nga bala sa lawas niini.

Gihatagan og pasidungog ni de la Rosa si Valiente ug gitaoran og medalya ng sugatang magiting ug gihatagan og brand new nga armas nga kalibre .45 nga pistola.

Lakip sa gihatagan og armas si PO1 Jemuel Villaflores nga napusilan ni PO3 Ryan Quiamco atol sa engkwentro niini sa syudad sa Talisay.

Ang pagdoaw sa labing taas nga opisyal sa kapulisan tibuok nasud naghatag og kadasig kang Valiente nga mopadayon sa iyang trabaho.

“Lipay na kaayo ko nga diri ang Chief PNP, human ani mopadayon ko sa akung trabaho kay wala ni makahatag nako ug kahadlok,” matod ni Valiente.

Giila sila nga bayani tungod sa ilang didikasyon sa trabaho nga bisan naghatag og risgo sa ilang kinabuhi wa sila mopakita og kahadlok aron lang masumpo ang illegal nga drugas.

Nalipay si dela Rosa nga dunay dagkong mga isda nga nalambigit sa illegal nga drugas ang nangamatay sama ni Quiamco nga usa sa ginganlan ni President Rodrigo Duterte.

Usa sa iyang ipaimbestigar sa Camp Crame nganong naa si Quiamco sa Sugbo nga unta didto man kini gidestino.

Mibahad siya nga kon dunay mamatud-an nga nakakwarta nga pulise sa ulohang buhatan iya kining silutan.

“Basin naghatagan napud na og kwarta didto mao nang present siya didto nya naa siya diri. Bantay lang mo kay kon ma validate nako na nga gibayaran mo kami diri nagpakamatay sa internal cleansing kamo gibinoangan rako ninyu bitayon ta gyud mong mga pulisa mo bantay ramo,” matod ni dela Rosa.