DI lang kay sa bulan kutob ang gugma ning bag-ong dalit sa Star Cinema kon dili hangtud gyud diay sa mga bitoon. Di diay I Love You To The Moon and Back ang ulohan kon dili I Love You To The Stars and Back gyud. Sukol ka ana?
Sila si Julia Barretto ug Joshua Garcia ang mga bida niini. Morag nagkagustohay ra ba kuno ang duha.
Wa pa hinoon kini magpasabot nga sila na. Pero morag gamay na lay kulang. Hinaut di kini pautot alang sa pelikula.
Sa unang higayon, adto sa mga dakbayan sa Iloilo ug Bacolod ipahigayon ang press conference sa pelikula. Backstage ang Cebu.
Tungod niini, nilayat ngadto sa duha ka dakbayan ang promo diva nga si Josie Pereyra. Ato lang unya siyang pangutan-on kon unsay nahitabo didto.
Nipasalig hinoon si Ms. Josie nga anhi sa Cebu himoon ang presscon sa pelikula nila ni Piolo Pascual ug Toni Gonzaga sa uwahing bahin sa Septyembre.
u25cf ● ●
Wa lang damha, ang Patay Na Si Hesus usa sa tulo ka mga pelikula sa nilabayng Pista ng Pelikulang Pilipino nga gipasidunggan sa pagkahuman sa usa ka semana nga kalihukan.
Nadawat niini ang Jury’s Choice Award samtang ang 100 Tula Para Kay Stella nakadawat sa Audience Choice ug ang Birdshot sa Critics Choice award.
Ang nakanindot pa gyud kay na-extend pa ang pagsalida sa Patay Na…, 100 Tula… ug Bar Boys. Kini tungod kay gidugok kining tulo sa mga tumatan-aw.
Di lang dinhi sa Cebu ug sa ubang lugar sa Visayas ug Mindanao gidugok ang Patay Na… kon dili hasta usab sa Manila.
Saksi ko sa pag-agik-ik sa mga nanan-aw sa mga kataw-anang esena sa Patay Na… ug sa pagpakpak nila sa paghuman sa pelikula. Maayo untag masundan pa kini og laing Binisaya nga pelikulang di lang makalingaw kon di nindot sab pagkahimo.
u25cf ● ●
Mga pahalipay sa Purok Kawayan, Kulo ug Sambag sa pagdaug sa Sadsad sa Oslob 2017 niadtong Dominggo. Ang Purok Acacia ang nakadaug sa Best Float ug Best San Roque impersonator.
Ang kalihukan tipik sa kasaulogan sa pista ni Sr. San Roque sa Brgy. Poblacion, Oslob.