DUHA ka mga higayon nga gihulga ang Bureau of Jail Management and Penology (BJMP 7) nga adunay jail break nga mahitabo sa pasilidad sa New City Jail.
Unang kasayuran ilang nadawat pinaagi sa text message alas 5 sa hapon sa miaging adlaw ug nausban kagahapon sa buntag hinungdan nga gialerto sa BJMP 7 ang ilang striking force.
Ilang gisuhid ang City Jail nga gikaalarma sa libuan ka piniriso.
Si Konsehal Dave Tumulak ,chairman sa public order and safety, nagkanayon nga nasuspenso og upat ka oras ang dalaw sa City Jail sanglit gisusi sa mga opisyal sa BJMP ang taho nga ilang nadawat nga nakumpirmar nga di tinuod ang impormasyon.
Ang konsehal kinsa personal nga nibisita sa BJMP 7 nibutyag nga gisusi sa mga opisyal sa pinangulohan ni Regional Director Dennis Rocamora kon si kinsa ang nagpadangat sa maong mensahe.
Giklaro ni Tumulak nga niresponde dayon ang striking force sa BJMP sanglit ang matag kasayuran nga moabot sa ilang buhatan ilang hatagan og bili hilabi na kay naghulga.
Ang konsehal nakighinabi sa mga piniriso kinsa gipili sa libuan ka mga inmate nga maoy mangulo ug mopaabot sa ilang mga yangongo sud sa prisohan.
Si Ramil Lequin, presidente sa mga piniriso, nipasalig kang Tumulak ug mga opisyal sa BJMP nga way mahitabo nga pagpang-eskapo sanglit ang mga binilanggo mopatuo sa ilang mga labaw. (PAC)