UPAT ka mga motorsiklo nga gidudahan nga kinawat ang nadiskubrehan ug nabawi sa kapolisan human mapatay sa miaging gabii ang suspetsadong karnaper sa sityo Bato, Barangay Ermita, dakbayan sa Sugbo.
Usa ka wa hiilhing tawo ang niduol ug dayong pusil samtang may giasikaso si alias Bunso, sa usa sa mga motor nga nabawi.
Matod ni Chief Inspector Jacinto Mandal, bag-ong hepe sa Carbon Police Station, nga nakadawat sila og alarma nga dunay tawo nga gipusil.
Daling nakaresponde ang iyang mga sakop sa dapit ug ilang napalgan si Bunso nga nagbuy-od duol sa upat ka mga motorsiklo.
Ang upat ka mga motorsiklo gitabunan og trapal daplin sa dagat.
Ang mga motorsikllo naglangkob sa Yamaha Mio may plate number GA 74164; Kawasaki Fury TY 5160; Honda XRM GD 87219; ug Yamaha scooter WO 6511.
Atol sa ilang imbestigasyon, way tawo nga mipatim-aw nga nakakita sa hitabo ug pulos nangambot.
Usa ka kabhang sa bala gikan sa armas nga kalibre .45 nga pistola ang napalgan sa dapit nga nahitaboan.
Subay sa ilang pakisusi, ilado na si Bunso nga mangawatay og motorsiklo.
Nailhan na siya ni Mandal samtang nadistino pa kini sa Mabolo Police Station.
Nanawagan si Mandal sa mga gikawatan og motor nga mopakita sa ilang buhatan aron maila ang mga motorsiklo nga gituohang kinawat.
Samtang magpadayon ang ilang imbestigasyon kon si kinsa ang mipusil kang Bunso apan maglisod sila kay way bisan usa ka tawo nga nikooperar.