NITALA lang ang Northern Mindanao Regional Athletic Association (NMRAA) taekwondo team og duha ka gold, usa ka silver ug tulo ka bronze medals atol sa 2018 Palarong Pambansa, diin nahuman niadtong Domingo didto sa Vigan City, Ilocos Sur.
Wala kini maduplikar ang naangkon sa NMRAA niaging tuig nga adunay pito ka gold, upat ka silver ug walo ka bronze medals.
Ang prize fighter nga si Michael Porras Jr. mao ang nibandera sa NMRAA taekwondo team agi pagbuak og record hold nga upat ka gold medals sa secondary boys division niaging tuig.
Karon, usa ka gold ug silver lang ang naangkon ni Porras sa individual ug team poomsae sa secondary boys division, sunod-sunod.
Nitala sab og gold si Laizel Abucay sa 52 kgs kirogi (sparring) secondary girls, samtang tulo pa ang nibingwit sa bronze.
Matod pa sa amahan ni Porras nga si Michael Sr., nautro ang polisiya sa prestiyusong Palaro diin nalimitahan lang si Porras modula sa poomsae.
Niaging tuig, parehas niaway si Porras sa kirogi ug poomsae hinungdan nitala siya og upat ka gold.
“Nautro gyud ang polisiya ug gipapili si Mac-Mac asa siya modula. Gipili ni Mac-Mac ang poomsae,” ingon sa amahan.
Kung mao ni ang bag-ong polisiya, dili mabuak ug mawala sa kasaysayan sa Palarong Pambansa ang record hold ni Porras.