NAKASINATI og pagdaot sa tiyan ug pagkalibang ang pipila ka mga residente sa Barangay Dawayan, lungsod sa Villanueva, Misamis Oriental.
Gibutyag ni Rhanndy Akut, dako sa Misamis Oriental Cares (MisOr Cares) System, niingon nga posibleng tungod kini sa kontaminasyon sa tubig.
Nagsugod kini niadtong Biyernes nga duha pa ang natalang kaso ug niadtong Lunes miabot na ngadto sa 21 ka residente ang apektado.
Gisuta pa karon sa mga health officers kon unsa gayud ang hinungdan sa pagsuka-kalibang sa mga residente ug gikuha na ang sample sa tubig, ug rectal swab aron susihon.
Gibutyag ni Akut nga ang nasinati karon sa mga residente usa ka sintomas sa amoebiasis ug cholera apan dili pa niini makumpirma kon mao gayud kini ang hinungdan labina gisuta pa kini karon panahona sa mga health officers.
Gituohan sa mga residente nga tungod sa giinom nga tubig maoy hinungdan sa pagsuka kalibang gumikan kay daw gituohang adunay duga sa kasikbit nga kompanya nga gaagi sa ilawom niini.
Hinuon padayon pa kining gisuta.
Gipangdala ang mga biktima sa nagkalain-laing tambalanan sa probinsya ug ning dakbayan sa Cagayan de Oro.
Samtang gihimo sa mga health officer ang lakang sa pagresolba niini nga problema.
Sa pagkakaron, giapod-aporan na ang mga residente og mga tambal ug giabisohan nga dili usa moinom og tubig gikan sa dapit ug kon mahimo pabukalan kini og maayo usa imnon.