ERNESTO D. LARIOSA
San Fernando, Cebu
DILI kaayo habog apan luho ang Palm Grass Heritage Hotel sa may dalan Junquera. Gitawag kini sa maong ngan kay misyon sa hotel ang paghangop ug pagbuhi sa kultura ug kabilin nga Sugbuanon., Sa ikapito ug katapusang andana didto ang paborito niyang Little Bar kilid sa madanihon nga swimmung pool.
Mao pay pagka human sa book launching sa libro ni Adonis Durado dungan sa pagkatilok sa usa ka galon nga tuba nga lina sa Dalaguete nga gida ni magsusulat-magbabalak Lam Ceballos nga gituyo niya pagpalit sa tubaan sa Pasil.
“Lam, saka ta sa itaas sa Little Bar modimdim tag beer.” giagni niya ang suod niyang higala.
“Okey, Ning, pero usa ra ka botelya ang ako, lisod ang igo kon magsagol.” Kini si Lam dugay nang nagdisiplina sa kaugalingon. Lagas sa kalibutan kay 75 anyos na maguwang niyag duha ka tuig.
Mikuyog si Kevin ug Chino Borden. Kini si Kevin ug Borden, mga award-winning young writers sa Sugbo. Hilom ang bar sa ilang pag-abot kay wa pay kustomer. Sa kilid mibad-as sa ilang mga mata ang puti nga legs sa usa ka chick nga naligo uban sa pares nga Amerkano.
Mi-order siyag beer. Miduol si Rose, ang amiga niyang hotel staff nga maoy in-charge karon sa bar. “Pila ka botelya, Sir Erning?” Mapahiyumon si Rose nga mistisilya tan-awon sa iyang make-over.
Misugod sila pag-inom sa 12 ka mga boteya niyang gi-order. Si Lam hugot nga naggunit sa usa ka botelya daw hadlok nga kini molupad. Paglabay sa tunga sa oras saba na kaayo si Kevin diin di na masunod ang pilit nga linitukan. Samtang si Chino mipilit ang mga mata sa naghalog nga Amerkano ug iyang chick sa tubig. Taudtaod namatikdan niya nga mihanap na ang iyang panan-aw, apan klaro pa niya nga may guwapang babaye nga iyang nakita nga milabay sa ilang luyo ug nagpahiyom kaniya. Iyang pagtuo usa sa mga guest nga nag-estar sa hotel.
Untop alas 3:00 sa taknaan sa bungbong sa iyang pagmata. Sa hotel diay siya makatulog. Maoy iyang pagtuo nga nahubog siya ug dinhi lang siya pakatulga sa iyang mga higala. Mitindog siya. Bugnaw kaayo ang iyang lawas tungod sa aircon. Kinahanglan makainom siyag init nga kape. Mamasin siya sa bar kay tingalig naa pa si Rose. Migawas siya sa kuwarto. Naaninaw niya nga nia pa diay siya sa 7th floor. Sa unahan nagsuga pa ang bar. Apan mingaw ang bar sa iyang pagtangka. Way tawo siyang nakita gawas sa mga gagmayng kurtina nga misayaw-sayaw kay gihapuhap sa huyuhoy. Ang tubig sa swimming pool nag-urong daw di buot patandog sa katigmi sa kaadlawon. Molingkod na unta siya dihang may misangpit sa lumoy kaayong tingog, “Did I disturb you?” Sa iyang paglingi nakita niya ang matahom kaayong linalang nga karon pa niya ikahibalag.
“No, you are not disturbing me,” matod niya sa hinay nga tingog kay wa siya makatuo sa iyang nakita. Buot siyang mangutana, apan gigakutan ang iyang mga ngabil sa kataha. Igo lang siyang nagpakahilom ug naghuwat sa sunod nga isulti sa babaye. Nasud-ong niya nga urog karaan ang gisul-ob nga sinina niini. “Ganahan kong mopasiyo liyok sa swimming pool, mahimo ko nimong ubanan, Senyor?” Nag-senyor kini nga misangpit kaniya. Kinsa kaha kini siya?
Miabay siya sa babaye. Nahanggap niya ang kahumot sa agwa niini. “Abi nimo gimingaw ko sa siyudad, labi na dinhing dapita. Didto, o, sa Teatro Junquera.” Mitudlo kini sa ilang luyo. Wa siya makaila sa gisulting ‘teatro’; mikunot iyang agang. Unya, migunit ang babaye sa iyang bukton. “Ayaw kataha, I like people who are writers.” Gitan-aw niya ang babaye. Mipahiyom kini kaniya kansang kandiis miarko sa aping. Unya, mitan-aw ang babaye sa iyang relo. “Yuna pa, duna koy gikalimtan magkita lang ta sunod.” Nagdali kining mitalikod subay sa daplin sa swimming pool. Nakita niya nga morag naglutaw sa hangin ang linalang. Nanindog ang iyang mga balhibo. Sa silangan milamhoy na ang banagbanag.
Pagkabuntag diha si Rose sa bar ug iyang gisaysayan mahitungod sa babaye. Kalit giukoban kini sa kahilom. Taudtaod, mitug-an si Rose,.
“Si Madam Margarita Alcuizar delos Reyes to siya, ang bantugang stage actress niadto kuno sa miaging panahon dinhi sa siyudad. Matod sa tag-iya ning hotel nga mopakita kini matag tuig atol og Biyernes, Sir.” Wa siya katingog; giinom niyag hurot ang nag-alisngaw pang kape. (KATAPUSAN)