MAGHUOT akong dughan nga magbasa sa Facebook post ni Ferlisa Contratista, usa ka peryodista nga naa na karon sa Philippine Information Agency (PIA), human sa kamatayon sa iyang kamaguwangan nga anak nga si Onli.
Sakit palandungon ang mawad-an og anak. Samot pa kay gipaulanan og bala samtang natulog.
Nagtuo kining suspek nga si Jessie Largo nga tigas siya. Apan klarong tinalawan ang mamusil sa tawo nga natulog.
Kay unsa may ayo niining usa ka tawo nga mamusil na lang kay dugay nang gisalikway sa uyab. Kawalay dungog intawn bisan pa taliwala unya sa makuyog niya sa bilanggoan. Nagtuo siya nga bisan mga kriminal morespeto og tawo nga ingon niini?
Sa pagkakaron, ang atong gipaabot mao ang positibong balita gikan sa kapulisan nga ila nang nasakpan kining suspek nga si Jessie Largo.
Kat-on
Salamat sir Em Alipe sa pag-imbitar kanako sa pag- anunsyo sa publiko sa proyekto sa iyang mga anak nga mao ang “Kat-On.”
Programa kini nga gidesensyo nga magpabilin ang mga bata nga motungha sa high school ug dili mo-drop out.
Atong nasayran sa miaging Sabado nga na-testing na kini ug napruyba nga epektibo diha sa Barangay Luz. Ug tuod man, ila nang i-replicate ang maong proyekto sa ubang mga barangay sa tibuok Pilipinas.
Atol sa kalihokan sa Kat-On diha sa Waterfront Hotel sa miaging Sabado, atong mahinumdoman nga didto si Barangay Kapitan Ramil Ayuman sa Apas, mga konsehal sa Barangay Guadalupe, mga opisyal sa Cogon-Ramos, ug sa Mandaue Central.
Ug klarong nakauyon sila niining programa nga mo-tutor sa mga bata sa subject nga English ug Math.
Geeks on a beach
Paghisgot nilang Em Alipe kabahin sa Math, nakahinumdom ko ug ako dayong gisuginlan ang mga Alipe kabahin sa gipang-anunsyo nga mga geeks nga gikan sa Silicon Valley sa Amerika.
Matod pa nilang Yobie Benjamin, nagkinahanglan sila og mga mathematicians alang sa mga advanced nga mga ICT projects lakip na ang artificial intelligence.
Mayweather
Nalipay ko nga holiday kagahapon kay adlaw kini sa final episode sa Games of Thrones. Bitaw, mas lingaw ang maong salida nga giatangan sa tibuok kalibutan kay sa Mayweather-McGregor fight.
Ubay-ubay sa akong mga kaila ang nagka-interes nga motan-aw sa pay-per-view kon itandi niining bugno nilang Floyd Mayweather ug Conor McGregor.
Ang nakabati man gud kay si McGregor gipugos nga mosangka dili ginamit ang mixed martial arts nga maoy iyang sports. Tugtan pa lang nga makapatid, makasiko, ug makalubag sa liog kini si McGregor, na kaanindot unta tan-awn sa dangatan ni Mayweather.
@anol_cebu sa Twitter