SECTIONS
Thursday, November 15, 2018

Lonzon: Kapitan nga di PDP delikado

DELIKADO ning pahibawo sa Department of Interior and Local Government (DILG ) sa pagpasaka og kaso sa mga barangay kapitan nga wa mopatuman sa kampanya batok sa ilegal nga drugas.

Di ba kaha kini gamiton batok sa mga kapitan nga dili taga Partidong Demokratikong Pilipino ( PDP) subay sa nagsingabot nga barangay election ug hangtod na sa midterm elections sa 2019?

Di ba ang DILG maoy gigamit sa administrasyon sa paggukod sa ilang kontra sa pulitika sa miagi pang mga administrasyon?

Kon kini tinuod di lang kapitan ang maapeke apil na ang mga mayor nga ilang kaatbang sa pulitika.

Eleksyon na ra ba sa barangay karong Mayo 14 ug atong paabuton daghan ang mogamit sa partidong PDP kaysa Liberal Party (LP) sa kahadlok nga initan.

Moabot unya sa punto sa panaglalis kay mag-iyahay naman sa pagpangangkon nga PDP sila bisag non partisan ang eleksyon sa barangay.

Akong kabalaka ang mga kandidato sa Sangguniang Kabataan ( SK ) ma-impluwensya sa kukhan ug tang-ang pulitiko nga maoy nagpadagan kanila.

Dino ug Tomas

Alkanse ang katawhan sa away nila ni Presidential Assistant to the Visayas Michael Dino ug Cebu City Mayor Tomas Osmeña sa isyu sa Bus Rapid Transit (BRT).

Si Dino nga nagsalig nga maoy paminawon ni Presidente Rodrigo Duterte, milampos sa pagbabag sa tinguha ni Osmeña sa pagpatuman sa BRT.

Kon imong sabton kon supak man si Dino sa BRT makita sab nimo ang anggulo sa iyang pagpaka-uwaw ni Tomas sa gi-post sa mayor nga madayon na ang BRT.

Apan wa madayon kay ang Department of Transportation mirekomendar sa Department of Finance sa di pagpadayon sa maong proyekto tungod ni Dino.

Si Tomas may pagka-arogante man sab ni. Pero niining isyu sa BRT dili lang unta gamiton ni Dino aron lang makabawos sa ilang contest sa hambog pinaagi sa pagpiang sa proyekto.

Dinalian man kaha nga solusyon ang gikinahanglan aron molugak og gamay ang problema sa trapik sa siyudad, nganong lisudlisuron pa man ni Dino aron babagan ang BRT aron paburan ang Light Rail Transit (LRT)?

Matod pa ni kanhi Cebu City mayor Mike Rama nga nahinabi sa Agila mas maayo pa ipatuman ang BRT ug LRT.

Gisaway sab ni Rama ang proyekto nga underpass sa Natalio Bacalso Avenue nga maoy naghatag og problema sa trapik.

Naa baya sa punto si Rama nga dili kini magamit sa ipatuman nga BRT. Magamit unta kini kon gipalapdan ang karsada sama sa dalan V. Rama nga wa makasinati og trapik.

(Email: efrenlonzon77@gmail.com Text: 09235562777)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!