SECTIONS
Thursday August 16, 2018
SUPERBALITA CEBU

Wa nay mock polls sa Cebu: Comelec

BISAN sa gilantawan nga posibleng kalibog unya sa mga botante sa regular nga barangay elections ug alang sa Sangguniang Kabataan, wala’y naka-schedule nga mock polls dinhi sa Sugbo.

Masaligon hinuon ang Cebu Provincial Commission on Elections (Comelec) Ferdinand Gujilde nga mapasabot og tarong sa mga sakop sa Electoral Board (EB) ang mga botante, ilabi na kadtong mga nag-edad ug 18 hangtud 30 anyos, labot sa pag-gamit ug duha ka balota sa eleksiyon.

Niadtong Sabado, dunay gihimo nga mock election sa kaulohan, diin nitumaw ang kalibog sa nisalmot nga mga botante kay dunay pipila kanila nga nakadawat og duha ka mga balota. Naglibog usab sila kon asa kini ihulog kay usa man lang ang ballot box.

Bisan og posibleng mahitabo kini sa Sugbo, walay naka-skedyul nga mock election dinhi.

Giangkon ni election officer Gujilde nga posibleng makamugna gyud ug kalibog ang pagdawat og duha ka balota sa mga botante nga nag-edad ug 18-anyos hangtud 30-anyos. Bisan kadtong wala nagpa-rehistro sa SK apan nasulod sa maong age bracket, automatic usab nga malakip sa mga SK voter.

Gipadayag no Gujilde nga sayon ra hinuon ang pag-ila sa balota nga alang sa SK ug barangay. Kon SK, pula ang font sa mga suwat niini samtang itom alang sa balota sa regular barangay election.

Di sab angay malibog ang mga botante kon asa kini ihulog kay duna man lay usa ka ballot box sa matag presinto. Trabaho na sa mga sakop sa EB ang pag-segregate niini sa dili pa ang inihapay sa boto.

Inay nga mohimo ug mock election o dugang pagpasabot sa mga botante bahin sa proseso sa eleksiyon, awhagon sa Comelec ang mga election officers ug mga EB nga moserbisyo sa piniliay.

Gitakda sa Mayo 1 ang training sa mga EO ug Mayo 3-11 ang training sa mga EB. Matod ni Gujilde, ipaubos sila sa simulation sa proseso sa pagboto ug tudluan sila sa unod sa general instruction sa piniliay.

Bisan ug dunay posibleng lapso atol sa eleksiyon, kompiyansa ang Comelec nga dali kining matagad, depende usab sa discretion sa mga EB.

Ang mga nag-edad ug 15-17 anyos makadawat lang og usa ka balota alang sa SK samtang usa lang usab sa mga nag-edad og 30 anyos pataas alang sa regular nga piniliay sa barangay. (AZDL)


VIEW COMMENTS