GIHAGIT ni Davao City Mayor Sara Duterte-Carpio ang Task Force Davao (TFD) nga kab-uton ang zero terror incident nga rekord sa dakbayan sud sa mosunod nga napulo ka tuig.
“Ang pinakadako nga challenge nako sa ilaha is 10 years nga walay incident even more years nga walay incident nga mahitabo diri sa siyudad sa Davao,” suma sa mayor atol sa TFD's 15th anniversary Martes, Abril 23, sa headquarters sa Sta. Ana Pier.
Siya, usab, midayeg sa paningkamot sa TF Davao troopers.
“Allow me to give my commendation for your anti-terrorism that has proven to be very dynamic and responsive throughout the years. While there have been countless challenges, I could say that the past 15 years have seen more successes in capturing and fighting against and apprehending criminals and terrorist,” suma sab sa mayor.
Ang anibersaryo sa TF Davao nakasentro sa tema, “Kinse ka tuig nga matinud-anong nag-alagad sa mga Dabawenyo."
Ang task force namugna niadtong 2003 human sa duha ka pagpamomba sa Davao airport ug Sasa Wharf.
Si Duterte-Carpio nagkanayon nga sa milabay nga mga tuig, ang TFD nahimong garbo sa mga Dabawenyo.
Siya midugang nga ang mga Dabawenyo swerte tungod walay pagpangabuso nga reklamo batok sa mga sakop sa Task Force Davao nga natala sa dakbayan.
Si TFD commander Colonel Nicolas Mempin nagpasalamat sab sa mga stakeholders sa ilang suporta sa TFD mao nga natuman nila ang misyon sa pagpatunhay sa kahusay ug kalinaw sa siyudad.
Isip usa mga yanong lungsoranon sa siyudad, nagpasalamat ako nga naa kanunay ang TF Davao nagseguro sa kalusawan natong mga Dabawenyo.
Apan, Colonel Mempin, duna lang koy diyutay nga hangyo nimo, sir, basin pwede nimo nga masubay ang inyong checkpoints?
Kini tungod kay dihang miagi ako sa Sirawan checkpoint sakay sa motorsiklo niadtong Dominggo sa buntag, wa na man kami girekisa sa imong mga sakop.
Uroy, simbako, dunay usa sa mga motorista nga nagdala og bomba niadtong adlawa, segurado gyud nga nakalusot kay luya kaayo imong mga tawo.
Hinaut pa unta nga imo kining atimanon aron matuman ang hagit
sa atong pinangga nga mayor nga di kamo malutsan sa terorista.