NAKADAWAT og warning ang mga station commanders sa Davao City Police Office (DCPO) gikan kang DCPO director Senior Superintendent Alexander Tagum labot sa mga insidente sa pagpamatay sa dakbayan.
Kini ang gibutyag ni DCPO spokesperson Senior Inspector Ma. Theresita Plaza-Gaspan human nagpasidaan si Tagum sa iyang mga station commanders nga sulbaron ang mga kaso sa pagpamatay ubos sa ilang area of responsibility (AOR).
Sa datos sa DCPO gikan Abril 17 hangtud Abril 22, duna nay unom ka mga kaso sa pagpamatay diin usa sa AOR sa Talomo Police Station, duha sa San Pedro Philippine National Police (PNP), usa sa Buhangin PNP, usa sa Sasa PNP ug usa sa Calinan PNP.
Giingon ni Gaspan nga ang duha ka mga kaso "cleared" na sanglit nailhan na ang mga suspek ug anaa na sila sa proseso sa pagpasaka og kaso ubos sa regular filing sa korte.
Ang na-clear mao ang shooting incident sa Talomo PNP ug ang usa ka stabbing incident sa San Pedro PNP.
Nagpabilin pa sab nga "unsolved case" ang duha ka shooting incidents ubos sa San Pedro PNP ug ang usa sa Sasa PNP ingon man ang usa ka stabbing incident sa Buhangin PNP ug usa ka dead body found sa Calinan PNP.
Gitataw ni Gaspan nga nasayod nang daan ang mga station commanders unsay ilang posibleng dangatan kung di nila masulbad ang maong mga kaso sa ilang AOR. (Jeepy P. Compio)