GIKLARO ni Cebu City Mayor Tomas Osmeña nga ang mga empleyado lang sa Barangay Ermita, gawas sa garbage loaders, ang di niya hatagan og allowances sukwahi sa nanggawas nga mga taho nga tanang 80 ka barangay.
Usa sa rason sa mayor kining gihimo sa mga tanod sa barangay nga nangolekta og P10 sa mga sidewalk vendors nga matod pa di angay nga buhaton.
Subay niini, ang City Treasurer’s Office nipadala na kagahapon og direktiba sa tanang opisyal ug empleyado sa barangay Ermita nga nagpahibawo nga subay sa City Ordinance no. 1486, ang CTO lamang ang adunay mandato sa pagkolekta sa market fees.
Dugang ni Osmeña nga kon di kini hunongon sa Ermita, gamiton ni Osmeña ang tanan niining legal options kay alang niya di kini angay kunsentihon kay di siya makatugot nga mahitabo kini sa Siyudad.
Gipaabot ang Siyudad nga mosang-at og kaso batok sa naasoy’ng barangay.
Nausab sab ang huna-huna sa mayor kalabot sa 10 ka mga barangay sa siyudad nga napakyas sa pag-sumiter sa ilang weekly accomplishment report sa Cebu City Office for Substance Abuse Prevention.
Unang niingon ang mayor nga putlan og allowance ang mga tanod sa maong napulo ka barangay apan kagahapon lang niingon si Osmeña nga mohatag siya og one final chance sa maong mga barangay.
Mohatag og tsansa ang mayor sa maong mga barangay nga gilangkuban sa Agsungot, Poblacion Pardo, Punta Princesa, Cambinucot, Pahina San Nicolas, Paril, Apas, Inayawan, Mambaling ug Sudlon II human sa pakig-istorya niini sa iyang mga konsehal nga sa Bando Osmeña Pundok Kauswagan (BOPK) ug napasabot siya.
Gipaabot nga makig-istorya ang mayor kang Association of Barangay Council President Phillip Zafra aron hisgutan kini.
Samtang si Konsehal Dave Tumulak, chairman sa Committee on Public Order and Safety miingon kagahapon sa kaadlawon, dunay nahitabong kagubot sa Carbon Public Market human ang mga market vendor nag-display sa ilang mga baligya.
Giingong dunay mga tanod nga ang mga lamesa gipangkuhaan ug hiligi maong natuwad ang mga baligya.