UGMA ipahigayon na sab ang Vispop (Visayan Pop) sa SM Cinema One, 7:00 sa gabii. Ikatulong tuig na natong hukad ani nga kompetisyon sa panuwatay’g kantang Bisaya.

Ang unang Vispop nag­hatag natog mga kanta sama sa “Balay ni Mayang,” ang ika­duha naghatag nato’g mga kanta sama sa “Labyu Langga.” Duha lang kini sa mga Vispop songs nga naglanog-lanog na ron sa kahanginan.

Ang Vispop proyekto sa Artist Ko (Artist Kooperatiba), grupo sa mga musikero, manunulat, magbabalak ug uban pang mga artist nga nakabase sa Sugbo. Gisuportaan kini sa lain-laing grupo sama sa Filscap (Filipino Society of Composers, Authors and Publishers) ug Cebu Business Month.

Gihimo nato ang screening sayo ning tuiga. Tibuok adlaw natong gidebatehan ug gibotohan ang mga salmot. Hapit gani kulangon ang usa ka adlaw. Tiaw mo nang paminawon man gyod nato ang tibuok kanta una nato husgahan kun pasar ba ni alang sa sunod nga hugna sa botohay.

Sa ubang songwriting competition diin naimbitar sab tang mo-screen, maluoy na lang ko sa ubang entries kay intro pa lang taktak na. Kita sa Vispop nakasabot sa paninguha sa mga songwriter ug sa kalisud nga ilang giagian aron lang makasuwat og kanta, ma-record kini ug ma-submit. Manuwatay sab baya ta.

Karong tuiga, aduna tay 200 kapin ka entries; sa miaging tuig 100 kapin. Dako ning saka gikan sa unang Vispop nga wa gani kaabot og gatos ang ningsalmot. Apan sa gihapon, bisag usa ka libo pa ang mangapil, unom ra atong kuhaon nga finalists.

Tingali ang pangutana sa mga songwriters, labi na katong wa makasud sa finals, mao ni: Unsang kantaha ang atong gipangita sa Vispop? Una, modawat ta bisag unsang genre – RnB, ballad, novelty, rock, hip-hop, folk, metal ug unsa pa na diha.

Ikaduha, kay pop man ni, nangita tag kanta nga naay potential nga mahimong hit apan dili baduy. Lisud ni i-explain, sama nga lisud i-explain ang pulong “pop”.

Pero kini lang tingali: brayt ug witty ang pagkasuwat, simpol ang lyrics apan smart, hugot ang storytelling ug naay padulngan, ug dili kinaraan ang kinatibuk-ang timpla.

Ayaw na nang kanta sa bata nga gimingaw sa iyang papa sa Dubai; kanta nga naluoy sa mga basurero; kanta nga naghisgot sa pag-antos sa mga manindag mani; kanta nga nagwali; kanta nga nangandoy’ng mahimong sunod nga “Matud Nila.” Adto na i-submit sa ubang contest, dili sa Vispop.

Ang mga finalist rong tuiga: “Tug Ta Tug” (by Earnest Hope Tinambacan and Jerry Angelo Catarata), “Bok Love” (by Felipe Anjelo Calinawan and Therese Marie Villarante), “Brgy. Blues” (by Andy Calope), “Buwag Balik” (by Lourdes May Maglinte), “LQ (Sige La’g Away)” (by Adam Niel Corvera), “Pangandoy” (by John Stephen Cadelina and Irving Ladanan Guazon). (@Insoymada)