DAVAO DEL NORTE -- Gidugok sa gibana-banang tulo ka gatos ka mga miyembro-konsumante sa Davao del Norte Electric Cooperative (Daneco) ang public hearing nga gipasiugdahan sa Bayan Muna alang sa pagpa-imbestiga sa buhatan didto sa PCU Building, Highway sa Dakbayan sa Tagum, alas 10 sa buntag kagahapon.

Mismong si Bayan Muna Representative Carlos Isagani Zarate maoy nangulo sa maong pagdungog.

"Kini gihimo out of the complaints why nagkaroon ng duha ka grupo," sulti ni Zarate atol sa iyang pamulong mahitungod sa bangi sa grupo sa National Electrification Administration (NEA) ug Cooperative Development Authority (CDA) sa Daneco.

Gihisgutan sa Tigum ang House Resolution 974, usa ka resolution nga nagmando sa House Committees on Energy and Cooperatives Development nga imbestigahan ang problema sa tagdumala nga nasinati sa Daneco ug ang iyang Impending Privatization pinagi sa Entry and Eventual Take over sa pribadong kompaniya.

Tumong, matod pa, sa maong public hearing nga tigumon ang mga reklamo kabahin sa Daneco aron mahimoan kini og konkretong aksyon sa hawanan sa Kongreso.

Apil usab sa maong hisgutanan ang pagbatok sa pagpribado sa electric coop nga gikatahong mahitabo tungod sa pagburot sa utang ug nagapahitabong kaguliyang sud sa management sa kooperatiba.

Wala sa maong public hearing ang han-ay sa Daneco-NEA samtang sagad sa mga misalmot sa maong hisgutanan mao ang mga nakabayad sa CDA ug dunay diskontento sa pamaagi sa han-ay sa grupo sa Daneco-NEA.

Dugang tumong sa tigom aron nga gilayong maaksyunan ang mga yangungo sa mga miyembro-konsumante.

Apil sa mitambong mao si Mayor Joseph Nilo Parenas sa Asuncion, ang nag-inusarang munisipyo sa tibuok probinsiya sa Compostela Valley nga mga erya nga giserbisyuhan sa Daneco nga naputlan.

Kasamtangan kini nga gipasakaan og kaso sa Daneco-NEA didto sa Ombudsman tungod kay human maputlan ang munisipyo, ang grupo sa CDA ang mi-reconnect niini.

Gikuwestyon sa mayor sa maong proseso sa pagputol sa iyang gipamunoang munisipyo, ang danyos nga nahimo niini labi pa kay "updated" matod pa ang ilang bayad, apan tua sa kampo sa CDA.

Wala pa makuha sa SuperBalita ang habig sa Daneco-NEA atol sa pagsulat ning balita.

Apan una na nga gipakatag sa Daneco-NEA ang desisyon sa Korte Suprema nga nag-ila nga sila lamang ang otorisadong magpadagan sa kooperatiba.

Hugot usab ang panawagan niini nga sa ilang han-ay lamang mobayad og kuryente sanglit sila lamang ang naggunit sa orihinal nga resibo subay sa Authority to Print nga gipakanaug sa Bureau of Internal Revenue.