KOMPIRMADO nga aduna gyud diay panagtagbo nga natigayon tali sa duha ka higpit nga kontra sa politika nga sila kanhi Cebu City Mayor Tomas Osmeña ug konsehal Mary Ann delos Santos niadtong Biyernes sa niaging semana.

Matod pa sa taho nga mismong si Tomas Osmeña uban sa iyang asawa nga si Margot maoy mibisita sa panimalay ni delos Santos sa Barangay Lahug.

Wa man tuod mobutyag sa kinatibuk-ang detalyi kalabot sa gihisgutan apan nabaniog nga si delos Santos mao karon ang target sa Bando Osmena-Pundok Kauswagan (BO-PK) nga makuha gikan sa Team Rama.

Si delos Santos nga kaalyado ni kanhi mayor Alvin Garcia ubos sa Kugi Uswag Sugbo (Sugbo), ug si Osmeña, ang pangulo sa BO-PK, maoy kaatbang sa pagkamayor niadtong 2007 election.

Di usab malalis nga ubos sa administrasyon ni Osmeña diin kapitan pa usab si delos Santos sa Lahug grabi ang kainit sa panagbikil sa duha nga gani way pro­yekto nga nahatag si Osmeña ngadto ni delos Santos.

Apan karon nalahi na usab ang dagan sa relasyon tali sa duha.

Daw sa nabali na ang hapak sa hangin kay di halayo ang posibilidad nga madala sa tanyag ug moambak na ngadto sa BOPK si delos Santos.

Gani si Osmeña wa mosalikway sa posibilidad nga magpares si Margot ug si Mary Ann pagka mayor ug pagka bise mayor sa sunod eleksiyon.

Pero yuna ra. Di kaha ulo-ulo ra ni ngadto ni delos Santos? Kon itandi nimo ang percentage sa winnability tali ni delos Santos ug ni kanhi bise-mayor Joy Young mora man og dako kaayo og deperensiya.

Dali ra ba diayng isalikway sa BOPK si Young tungod lang ni delos Santos? Lisod tuohan unless dunay lang kasabutan.