PAIGO pa ang suplay sa bugas sa dakbayan sa Davao ning panahon sa ting-tanom karong Hunyo hangtod Agosto.

Kini ang gipasalig sa National Food Authority (NFA) sa dakbayan diin nagpabilin gihapon ang presyo niini sa merkado.

Si NFA-Davao City provincial manager Virgilio Alerta nagsulti nga andam ang ilang buhatan sa pagpagawas og barato gihapon nga presyo sa bugas diin sagad sa mga nanggawas karon pulos mga commercial rice.

Giingon ni Alerta nga sagad nagasaka karon ang presyo sa mga commercial rice tungod kay bulan sa tingtanom.

Gipasalig sab ni Alerta nga bastante pa ang bugas nga anaa karon sa ilang bodega nga molungtad pa hangtod Agosto hangtud sa pagbalik sa ting-ani.

"Gi-andam na nato ang mga bugas, kinahanglan magpagawas ang NFA og barato nga mga bugas kay mosaka man gyud ang presyo sa commercial rice kung lean months, sufficient pa man hinuon karon ang atong supply," ingon ni Alerta sa pakighinabi sa SuperBalita.

Sumala sa opisyal nga sa kasamtangan, duna pay 519 mil ka sakong bugas ang anaa karon sa ilang bodega.