SAMTANG ugma mao ang unang anibersaryo sa pagpamomba dsa Roxas Night Market sa siyudad sa Davao, ang katawhan makapangutana: ang panahon ba makaayo sa mga samad sa kalag human gikutlo sa mga dautang tawo?
Kapin 60 ka mga tawo ang nakalingkawas sa Roxas Night Market Bombing. Ang lama sa terorismo ug pagbusikad niadtong Septyembre 2, 2016 sa wa pa mag-alas 10 sa gabii nagpabiling mibagting sa dalunggan sa mga tawo nga tua didto.
Samtang ang night market nakarekober human sa pagbusikad, ang mga survivors pabilin nga mibati sa kasakit sa emosyonal ug pisikal.
Si Sheena Tagadaya, usa sa mga nakalingkawas sa pagpamomba uban sa iyang igsuon, nagkanayon nga unang tuig human sa trahedya nagkombinsi sa kaugalingon nga dunay kinabuhi human sa mga samad nga iyang naangkon sa insidente.
Si Sheena uban sa igsuon nga si Stephen niadtong gabhioan. Silang duha managsamang nasamdan. Apan sa duha, si Sheena nakaangkon og grabeng samad sa iyang spinal cord, mao nga nag-wheelchair siya.
Siya usab nakasinati og Atelectasis o kondisyon nga ang duha ka baga nadaut tungod sa shrapnel nga miigo niini.
Ang duha ka shrapnel anaa pa gihapon sa iyang tuong baga ug gi-monitor karon sa doktor.
Siya naundang sa iyang pagtuon sa kolehiyo tungod sa iyang kahimtang.
Laing survivor Dennis Larida, kinsa nawad-an og anak ug asawa sa insidente, nagkanayon nga ang iyang pagtuo nausab, kanunay nangutana sa Ginoo sa nahitabo sa iyang pamilya.
Apan sila Tagadaya ug Larida mapasalamaton sa tabang sa lokal nga gobyerno ug ni Presidente Rodrigo Duterte nga mitabang kanila nga makarekober sa maong insidente.