GIPUSIL patay ang u­­­sa ka mangabasay sa ko­petensiyang gikaaway niini human kini misulong balay niadtong Martes sa alas singko ang takna sa hapon sa Sitio Himungbongan, Barangay Taloot, lungsod sa Argao.

Si Ruben Molinar, 35, minyo, mangabasay sa usa ka lumber ug nagpuyo sa nahisgutang dapit ang namatay sa dihang nakaangkog samad pinusilan sa ulo ug lawas.

Si Danilo Gula, 34, ulitawo, usa usab mangabasay sa maong dapit, nadakpan sa kapulisan, og nakuhaan og .38 revolver nga may tulo ka kabhang sa bala nga gilabay sa kalibunan.

Si Sr. Insp. Alejandro Batobalonos, hepe sa Argao Police Station, nagkanayon nga dugay nang nagkaatraso ang biktima ug suspetsado tungod ra usab sa ilang trabaho.

“Kanang ilog-ilog nilag kustomer nga magpagabas sa lubi o kahoy mao ning ilang gi-awayan,” matod ni Batobalonos.

Matod pa nga ang duha nagbaylo-ay’g mga text messages diin naghinagitay og patay. Nakuha sa kapulisan ang selpon sa suspetsado ug didto nakita nila ang messages sa biktima nga mipadayag nga mag-abot sila sa eskina sa Taloot aron magpinusilay.

Nagkalalis ang duha ug mibunot ang biktima sa iyang armas pero na-ilog sa suspek ang armas.