GIAWHAG sa Office of the Civil Defense (OCD) 7 ang publiko nga magpabling abtik karon nga nagsugod na ang ting-uwan hilabi na sa mga lugar nga duol sa baha, pagdahili sa yuta ug storm surge.

Si Allen Froilan Cabaron II, ang pangulo sa Technical Support Division sa OCD 7, nitambag sa publiko nga perming mag-alerto ug magpabilin nga mahibawo sa weather advisory aron makapangandam.

Sagad sa rason karon sa uwan kining Inter-Tropical Convergence Zone ug Thunderstorm diin kalit moinit kaayo ug kalit lang sab nga mouwan.

Tambag usab ni Cabaron sa matag barangay nga kinahanglan nga aduna kini family and community disaster preparedness.

Nitataw usab siya nga anaa diha sa barangay level ang labing una nga moresponde kon panahon nga anaay kalamidad.

Ikaduha niini ang syudad, probinsiya ug ang regional agencies susama sa OCD 7 ug sa ubang ahensiya sa pangobyerno.

Niadto lang Sabado aduna’y gihimo ang probinsiya sa Sugbo pinaagi sa Cebu Provincial Disaster Risk Reduction and Management (PDRRM) chief Baltazar Tribunalo Jr. nga usa ka conference diin gitapok niini ang mga serach and rescue group aron mamahimo kini nga usa ka pederasyon.

Tumong usab sa maong panagtagbo nga mamahimong andam ang tanang search and rescue group.

Aduna na usab nga gipahigayon ang OCD 7 nga pre-disaster risk assessment aron masuta kadtong lugar nga mga haduol sa katalagman ug alang usab mahibawo sila unsa ang dapat buhaton.

Matod ni Cabaron nga 30 porsyento sa tibuok quick respond fund sa matag LGU ug ahensiya kinahanglan kini nga dili gastuon aron aduna pay magamit sa panahon nga aduna’y kalamidad.