Lapu-Lapu City Market Administrator Elena G. Caballes nibutyag nga problema gihapon sa merkado sa dakbayan ang pagpataka ug labay ug hugaw sa mga tindera sa mga kanal sud sa merkado.

Matod ni Caballes nga sagad sa mga ipanglabay mao ang hugaw gikan sa mga isda, mga karne, ug mga plastic material nga maoy hinungdan sa pagkabara sa agianan sa tubig.

Gitataw ni Caballes nga wa pa hinuon mahitabo nga mo-apaw ang tubig sud sa merkado tungod kay regular man ang pagpanglimpyo sa mga kanal sa merkado.

“Regular man ang atong clean- up sa drainage sa market, kausa sa usa ka buwan,” ni Caballes atol sa press conference kagahapon.

Dugang niya nga ang bugtong problema nila ilabi na karon nga miabot na ang ting- uwan mao ang pagsaka sa tubig gawas sa merkado.

Paambit niya nga matag higayon nga mohabwa sila sa mga hugaw sud sa merkado, kanunay nilang makuha di lang ang mga plastik apan mga gipanglabay nga mga nalatang unod sa karne nga maoy hinungdan nga kini mobaho.